QMDB TÓRAǴASY TASQYN SÝDAN ZARDAP ShEKKEN TURǴYNDARǴA NASIHAT AITTY (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Qostanaı oblysyna barǵan saparynda Qostanaı aýdanynda tasqyn sýdan zardap shekken turǵyndarmen kezdesip, nasıhat aıtty.

«Eshbir pende, tipti paıǵambarlar da ózin qasyret pen qıynshylyqtardan saqtandyra almaıdy. Sebebi synaqtardy beretin de, odan saqtaıtyn da jalǵyz Alla! Bul jaıly Quranda «Taǵabýn» súresiniń 11-aıatynda: «Basqa kelgen ár jamandyq Allanyń ruqsatymen ǵana bolady...» delingen.

Sabyrlyq adamǵa senim uıalatatyn, bolashaqqa úmitpen qaraýǵa, pendege qajyr men qaırat beretin eń bir izgi qasıet bolǵandyqtan, ár kez basqa túsken qıynshylyqqa sabyrlyq tanytýǵa umtylaıyq. Bul qıynshylyqtarǵa da moıymaı, el basyna týǵan synaqty birge eńseretinimizge senemiz. Alla Taǵala qaýiptiń betin qaıtaryp, halqymyzǵa qalypty ómir násip etkeı» dedi Naýryzbaı qajy Taǵanuly.

Aıta ketsek, «Zeket jáne qaıyrymdylyq» qory sý tasqynynan zardap shekken 300 otbasyǵa áleýmettik mańyzy bar azyq-túlik sebetin úlestirdi. Sonymen qatar múftııat atynan ystyq tamaq berildi.

​