QMDB TÓRAǴASY TORǴAI ÓŃIRINIŃ ZIIaLY QAÝYM ÓKILDERIMEN KEZDESTI
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Qostanaı oblysyna arnaıy issapary barysynda Torǵaı óńiriniń zııaly qaýym ókilderimen kezdesti.
Kezdesý barysynda ulttyq qundylyqtardy dáripteý, rýhanı murany saqtaý, din men dástúr sabaqtastyǵyn nyǵaıtý jáne óskeleń urpaqqa ónegeli tárbıe berý máseleleri sóz boldy.
«Sizdermen Ybyraı Altynsarın, Ahmet Baıtursynuly, Mirjaqyp Dýlatuly, batyr babalarymyz – Keıki men Amangeldi Imanov syndy tulǵalar shyqqan kıeli Torǵaı topyraǵynda júzdesip otyrǵanyma qýanyshtymyn. Alla Taǵala barshańyzǵa amandyq pen kúsh-qaırat násip etsin.
Rasynda qazaq halqynyń rýhanı tarıhynda ıslam dini men ulttyq dúnıetanymnyń ózara sabaqtastyǵy aıryqsha oryn alady. Ǵasyrlar boıy halqymyzdyń turmys-tirshiligine, ádet-ǵurpyna, ádebıeti men mádenıetine ıslam dininiń izgilikke negizdelgen qundylyqtary yqpal etti.
Úlkendi qurmetteý, ata-anany qadirleý, jetimge qamqorlyq jasaý, kórshimen tatý bolý, amanatqa adaldyq tanytý, muqtajǵa kómektesý sekildi qasıetter halqymyzdyń ómir saltynan berik oryn aldy. Bul qundylyqtar ıslamnyń kórkem minez ben izgi amalǵa úndeıtin qaǵıdalarymen úndesedi.
Alla Taǵala Quran Kárimde: «Rasynda, Alla ádildikti, izgi is jasaýdy jáne aǵaıynǵa járdemdesýdi buıyrady», – deıdi («Nahl» súresi, 90-aıat). Bul aıat ıslamnyń jeke adamnyń ǵana emes, tutas qoǵamnyń rýhanı jáne adamgershilik negizderin qalyptastyrýdaǵy mańyzyn kórsetedi»,-dedi Bas múftı.
Kezdesý sońynda Bas múftı el ıgiligi jolynda eńbek etip júrgen azamattarǵa rızashylyǵyn bildirip, óńirdiń rýhanı damýyna baǵyttalǵan jumystarǵa bereke tiledi.
