QMDB TÓRAǴASY TÚRKISTAN OBLYSYNYŃ ÁKIMIMEN KEZDESTI (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Túrkistan oblysyna sapary barysynda aımaq basshysy Darhan Satybaldymen kezdesti.

Kezdesýde óńirdegi dinı ahýal, jańadan ashylatyn meshitter, aımaqtaǵy din qyzmetkerleriniń bilimin jetildirý, Túrkistannyń rýhanı damýy tóńireginde sóz boldy.

Bas múftı bastaǵan delegatsııany jyly qabyldaǵan Darhan Amangeldiuly eń áýeli jyldyń alǵashqy saparyn túrki áleminiń astanasynan bastaǵandyǵyna qýanyshyn bildirdi. Din qyzmetkerlerimen árkez turaqty baılanysta ekenin aıtqan óńir basshysy bıyl Iasaýı muralaryn jan-jaqty nasıhattaý, dástúr qundylyǵy bastamasyn qoldaıtynyn jetkizdi. Sondaı-aq «Qylýet» rýhanı-mádenı ortalyǵynyń qurylysy basty nazarda dedi ákim.

Óz kezeginde Bas múftı aımaq basshysyna rızashylyǵyn jetkizip, Dinı basqarma 2024 jyldy «Islam jáne dástúr qundylyǵy» jyly dep jarııalaǵanyn aıtyp ótti. Sonyń aıasynda jyl basyn kıeli Túrkistannan bastap, búgin osy jerde din men dástúrge arnalǵan aıtýly konferentsııa ótetinin tilge tıek etti. Imamdardyń bilimin kóterýge arnalǵan oqý ornynyń ashylýy óte quptarlyq bastama dedi Naýryzbaı qajy Taǵanuly. Sonymen qatar Bas múftı Iasaýı muralaryn nasıhattaýǵa arnalǵan aıtýly jıyn josparda bar ekenin jetkizdi.

Kezdesý sońynda taraptar ortaq jobalardy birigip qoldaıtynyn málimdedi. 

Derekkóz: QMDB Baspasóz qyzmeti