QMDB tóraǵasy Túrkııa múftıimen kezdestI (FOTO)
Túrkııa Respýblıkasyna resmı saparmen kelgen QMDB Tóraǵasy, Bas múftı Naýryzbaı qajy Taǵanuly Ankarada Túrkııa Din isteri basqarmasynyń tóraǵasy Álı Erbashpen kezdesti.
Qazaqstannan kelgen delegatsııany jyly qabyldaǵan Túrkııa múftıi, professor Álı Erbash sońǵy 30 jylda qazaq-túrik baýyrlastyǵy nyǵaıǵanyn atap ótip, Bas múftıdi Qazaqstan Táýelsizdiginiń 30 jyldyǵy jáne búgingi Tuńǵysh Prezıdent kúnimen quttyqtady.
«Atajurttan jetkizgen sálemińizge alǵysym sheksiz. Bizdiń ekijaqty baılanysymyzdyń aýqymy keń. Árıne din salasy boıynsha árbir máselede kómek kórsetýge daıynbyz. Dinı bilim boıynsha shákirtterge qolaıly jaǵdaı jasaýǵa barynsha tyrysamyz. Óıtkeni san jyldar boıy aramyzda qalyptasqan dostyq qatynas bar. Túrkııaǵa qosh keldińiz. Alla saparyńyzdy sátti etsin» dedi Álı Erbash.
Óz kezeginde Bas múftı Naýryzbaı qajy Taǵanuly ystyq yqylasyn bildirip, qazaq ımamdarynyń bilimin jetildirýine qoldaý kórsetip kele jatqan Túrkııa Din isteri basqarmasyna, onyń tóraǵasy Álı Erbash myrzaǵa aıryqsha alǵysy men izgi nıetin jetkizdi.
«Atajurttan Anadolyǵa kelýimizdiń basty sebebi eki el arasyndaǵy ejelden qalyptasqan baýyrlastyqty arttyrý. Osy elde dinı bilim alyp jatqan shákirttermen kezdesý. Kúni keshe sol shákiretterge jaýapty ókil bekitildi. Sapar barysynda Túrkııa Din isteri basqarmasynyń jumysymen tanysyp, eki jaqty tájirıbe almasý josparda tur. Búginde bizdiń 100-ge jýyq ımamymyz osy eldegi irgeli dinı oqý oryndarynda bilimin jetildirýde. Biz dinı salada árqashan túrik baýyrlarymyzdyń demeýin sezinip kelemiz. Qoldaýlaryńyz úshin ózimniń jáne Qazaqstan musylmandary dinı basqarmasy atynan alǵysymdy bildiremin» dedi Naýryzbaı qajy Taǵanuly.
Kezdesý sońynda baýyrlas elderdiń dinı saladaǵy ekijaqty baılanysyn nyǵaıtý baǵytyndaǵy ıgi bastamalar men ortaq jobalardy birlese júzege asyrý jaıy sóz boldy. Naýryzbaı qajy Taǵanuly qazaqy dástúrge saı Álı Erbashtyń ıyǵyna shapan jaýyp, «QMDB-na 30 jyl» merekelik medalimen marapattady.
