QMDB TÓRAǴASY ULYTAÝ OBLYSTYQ MEShITINDE JUMA ÝAǴYZYN AITTY (FOTO)
Búgin Bas múftı Naýryzbaı qajy Taǵanuly Ulytaý oblysyna barǵan jumys saparynda Jezqazǵan qalasyndaǵy ortalyq meshitte juma ýaǵyzyn aıtty.
«Kisi aqysyn jeý – úlken kúná» taqyrybynda ýaǵyz aıtqan Bas múftı: «Dinimiz Islam tyıym salǵan aýyr kúnálardyń biri – kisi aqysyn jeý. Ǵalymdarymyz bul kúnány serik keltirýden keıingi úlken kúnáǵa jatqyzǵan. Sebebi, adam aqyretke kisi aqysyn arqalap baratyn bolsa, aqysy ketken adam «men ony keshtim» demeıinshe álgi quldy Alla Taǵala da keshirmeıdi. Alla Taǵala qasıetti Qurannyń «Baqara» súresi, 188-aıatynda: «Bir-birińniń malyńdy naqaqtan-naqaq jemeńder. Sondaı-aq, adamdardyń malynyń bir bóligin negizsiz jeıtinderińdi bile tura, bılerge para berýge tyryspańdar», – dep aıtqan.
Halqymyz urpaǵyna: «Eshkimniń ala jibin attama» dep, ózgege qııanat jasamaýdy, zııan bermeýdi, aqysyz mal-dúnıesine qol salmaýdy kishkentaıynan úıretip, qulaǵyna quıyp ósirgen. Ardaqty Paıǵambarymyz (oǵan Allanyń salaýaty men sálemi bolsyn) hadısinde: «Kim bir qarys jerdi zorlyqpen tartyp alsa, sol jerdiń jeti esesi qııamet kúni moınyna júkteledi», – dep eskertken» dedi.
QMDB Tóraǵasy juma namazynan keıin Jezqazǵan meshiti jamaǵatymen birge el amandyǵy men tynyshtyǵy úshin duǵa jasady.
