QMDB TÓRAǴASY ULYTAÝ OBLYSYNYŃ IMAMDARYN QABYLDADY (FOTO)
Búgin elordada Bas múftı Naýryzbaı qajy Taǵanuly Ulytaý oblysynyń ımamdarymen kezdesti. Kezdesýde QMDB Tóraǵasy din qyzmetkerlerine múftııattyń jyl basynda qabyldaǵan jeti baǵyt boıynsha jumystaryn Ulytaý oblysynda belsendi túrde júzege asyrýǵa nazar aýdardy.
Sonymen qatar, dinı saladaǵy ıgi isterdi aıryqsha yjdaǵattylyqpen oryndaý qajettigin jetkizdi. Bas múftı musylman jamaǵatynyń rýhanı birligin nyǵaıtý, jastardy destrýktıvti dinı aǵymdardyń ıdeologııasynan saqtandyrý máselesin sóz etip, osy baǵytta ýaǵyz-nasıhat jumystaryn júrgizýdi tapsyrdy.
Basqosý barysynda atalǵan aımaqqa bilimdi, tájirıbeli din mamandaryn qyzmetke tartý máselesi talqylandy. Kezdesý sońynda Naýryzbaı qajy Taǵanuly Ulytaý oblysynyń bas ımamy Eldos Qýandyqulyna naqty tapsyrmalar berdi.
