QMDB TÓRAǴASY ZAMANAÝI ULTTYQ-DINI AǴARTÝ ORTALYǴYNYŃ QURYLYSYMEN TANYSTY (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Atyraý oblysyna barǵan saparynda qalada salynyp jatqan zamanaýı ulttyq-dinı aǵartý ortalyǵynyń qurylys barysymen tanysty.
Jetpis shákirtke arnalǵan tórt qabattan turatyn ǵımarattyń jalpy aýmaǵy – 3200 sharshy metr. Oqý ortalyǵynda Quran jattaý men dinı saýat ashýdan bólek, dúnıelik ilimder de, sonyń ishinde el tarıhy, Alash zııalylarynyń ómir joly oqytylmaq. Ǵımaratta ustazdarǵa arnalǵan qyzmettik páter, dáris jáne májilis zaly, 100 adamdyq ashana men zamanaýı fıtnes zaly bar.
Bas múftı qurylys jumystarynyń tez ári sátti aıaqtalýyn tilep, ıgi iske atsalysyp jatqan jamaǵatqa, jomart jandarǵa alǵysyn bildirdi.
