QMDB: «Zeket» qory 50 otbasyǵa syılyq jasady (FOTO+VIDEO)
Qazir elimizde kópbalaly otbasylarǵa áleýmettik kómek kórsetilýde. QMDB janyndaǵy «Zeket» qory óńirlerdegi ókildikterimen birige otyra,osy bastamaǵa qoldaý kórsetý maqsatynda Astanada kópbalaly, qolynda múgedek balalary bar, turmys jaǵdaıy tómen 50 otbasyǵa kómek kórsetti. «Qaıyrymdylyq isteseń, qaıyryn óziń kóresiń» atty shara aıasynda olarǵa turmysqa qajetti azyq-túlikter taratyldy. Is-sharaǵa naıb múftı Baýyrjan Ábdirashuly qatysyp, Islamda qaıyrymdylyq jasaýdyń mańyzdylyǵy jaıly sóz qozǵady. «Zeket» qorynyń basty baǵyty áleýmettik az qamtylǵan, kómekke zárý jandarǵa qajetti qoldaý kórsetý ekendigi aıtylyp, aldaǵy ýaqytta bul ıgi is jalǵasatynyn atap ótti.
Kómek alýshy azamattardyń áleýmettik jaǵdaıy týraly aqparat «Zeket» mobıldi qosymshasyndaǵy Elektrondy bazaǵa engizilgen. Demek, kez kelgen adam kómekke laıyqty otbasylaryna óziniń kómegin jasaýyna múmkindik bar.
Aıta ketsek, jýyrda «Zeket» qory Taldyqorǵan qalasynda alty balanyń anasyna 11-baspananyń kiltin tabystady. Atalǵan shara «El úlesi – páterge» jobasy aıasynda júzege asty. Bul sharaǵa Bas múftı Serikbaı qajy Orazdyń ózi qatysyp, kiltti tabystady.
Sonymen qatar, 12-páter Aqtóbe oblysynda páterge asa muqtaj januıaǵa berildi. Maqsatymyz – qoǵamda turmysy tómen otbasylaryna kómek kórsetý. Bul shara turaqty túrde júzege asatyn bolady.
Qaıyrymdylyq jasasań – qaıyryn óziń kóresiń. «Zeket» korporatıvtik qaıyrymdylyq qory 2018 jyly respýblıka boıynsha 25 myń januıaǵa qaıyrymdylyq kómek kórsetti.
Sondaı-aq, 5 myńǵa jýyq áleýmettik az qamtylǵan balalardy mektepke qajetti qural-jabdyqtarmen, kıim-keshekpen qamtamasyz etti. Múgedek balalardyń em-domyna qarajat bóldi. Ótken jyly «El úlesi páterge» jobasy aıasynda baspanaǵa asa zárý 9 otbasyna páter berildi. 1 jylda qaıyrymdylyq baǵytynda 160 mln. teńge qarajat jumsaldy.
Alla Taǵala Quranda: «Bir jaqsylyq istegen adam on ese saýapqa ıe bolady» («Ánǵam» súresi, 160-aıat), – dep baıandaǵan. Osy rette QMDB «Zeket» qory jomart, qaıyrymdy jandardy ıgi, izgi, saýapty is-sharalarǵa belsendi túrde úles qosýǵa úndeıdi.
