QMDB janynan Aqsaqaldar keńesi quryldy (FOTO)
Búgin elordada Qazaqstan musylmandary dinı basqarmasy janynan Aqsaqaldar keńesi qurylyp, keńestiń alǵashqy jıyny ótti.
Bas múftı Naýryzbaı qajy Taǵanulynyń tóraǵalyǵymen ótken jıynǵa memleket jáne qoǵam qaıratkerleri Ómirzaq Ozǵanbaıuly, Amangeldi Aıtaly, Baqytjan Ertaev, Oralbaı Ábdikárimuly, Ǵarıfolla Esim, Smaǵul Elýbaı, Jabal Erǵalıev, Marat Toqashbaev, sondaı-aq ardager ımamdar qatysty.
QMDB Tóraǵasy Naýryzbaı qajy Taǵanuly: «Qaı dáýirde bolmasyn jastardyń jasampazdyǵy úlkenderdiń kóńilinen shyǵa qoımaǵan. Áıtse de, Paıǵambarymyz (oǵan Allanyń salaýaty men sálemi bolsyn) «Jastardyń eń jaqsysy – kárilerge uqsaǵany» dep aıtqandaı, ıaǵnı, túr-álpeti emes, júris-turysynan danalyq esip turatyn jas býynnyń qalyptasýyna kópti kórgen úlkenderdiń áseri mol. Biz kóbine qoǵamda, turmysta, otbasyda bolyp jatqan keleńsiz jaıttardyń saldarymen kúresýge ádettenip aldyq. Endi saldarymen emes, sebebimen kúresetin ýaqyt áldeqashan jetti.
Osy oraıda biz qazaq halqynyń erteden kele jatqan aqsaqaldar ınstıtýty men ájeler mektebin jandandyrýymyz qajet. Osy maqsatta tıisti is-sharalardy qolǵa alamyz. Atap aıtqanda, Aqsaqaldar keńesin quryp, respýblıkalyq Aqsaqaldar forýmyn, sondaı-aq «Qoǵamdaǵy áıeldiń róli» taqyrybynda respýblıkalyq ájeler forýmyn ótkizemiz. Bul is-sharalar qoǵamǵa oń áser etedi dep senemin. Dýaly aýyz qarttarymyz Dinı basqarmanyń qoǵammen baılanys baǵytyndaǵy jumystaryna jańa serpin beretinine senimimiz kámil», – dedi.
Jıynǵa qatysýshylar keńes jumysyn jandandyrýǵa qatysty oı-pikirlerin ortaǵa salyp, din men dástúrdi nasıhattaý, jastardy adamgershilikke baýlyp, zııandy ádetter men jat dinı aǵymdar jetegine erip ketýden saqtaý jóninde usynystaryn jetkizdi.
Sondaı-aq Bas múftı Naýryzbaı qajy Taǵanuly keńestiń júıeli túrde jumys isteýine jaýapty maman, Aqsaqaldar keńesiniń hatshysy retinde Aqparat jáne qoǵammen baılanys bólimi meńgerýshisiniń orynbasary, osyǵan deıin birneshe óńirde bas ımam qyzmetin atqarǵan Nurbek Esmaǵanbetti taǵaıyndaǵanyn málimdep, jıyn qatysýshylaryna tanystyrdy. Sonymen qatar, keńes múshelerine aıryqsha alǵysyn bildirip, ıgi tilegin jetkizdi.
