QMDB janynan Carapshylar keńesi quryldy (FOTO)

Búgin Qazaqstan musylmandary dinı basqarmasy janynan Sarapshylar keńesi quryldy.

Bas múftı Naýryzbaı qajy Taǵanulynyń tóraǵalyǵymen ótken keńes jumysyna elimizge belgili ǵalymdar men ustazdar, atap aıtqanda, naıb múftı Ershat Ońǵar, Dosaı Kenjetaı, Asylbek Izbaıyrov, Erlan Aqataev, Alaý Ádilbaev, Muhıtdın Isauly, Qalıjan Zańqoev, Qudııar Bilál, Qulmuhammed Mahanbet, Batyrjan Mansurov, Talǵat Jaqııanov, Jalǵas Sandybaev, Balǵabek Myrzaev, Keńshilik Tyshqan, t.b. ǵalymdar men sarapshylar qatysyp, elimizdegi dinı ahýalǵa qatysty oı-pikirlerin ortaǵa saldy. Sonymen qatar, sarapshylar keńestiń jumys baǵyttaryn talqylady.

«Qaı zamanda bolmasyn qoǵamnyń ilgeri damýyna parasat pen izgilik jolyn tańdaǵan ǵulama oıshyldar men ǵalymdar aıryqsha ról atqarǵan.

Sizder el arasynda, dinı, rýhanı salada aıtary bar, qoǵamdyq pikir qalyptastyryp júrgen tulǵasyzdar, belgili ǵalymsyzdar. «Aqyldasqan azbas, jaqyndasqan tozbas» deıdi halqymyz. Sizdermen keńesip, kelisip, júıeli jumys júrgizý nıetimen ózderińizdi osynda shaqyrdyq. Aldaǵy ýaqytta ózderińizben birge ortaq maqsat jolynda nátıjeli jumys isteımiz degen senimdemin», – dep atap ótti Bas múftı Naýryzbaı qajy Taǵanuly.

Elimizde musylmandyq dástúrli dinı mektepti qalyptastyrý, dinı turaqtylyqty nyǵaıtý, jamaǵattyń dinı senim birligin arttyrý, ulttyq qundylyqtardy nasıhattaý, t.b. taqyryp tóńireginde pikir alysqan sarapshylar ortaq maqsat jolynda birlesip, belsendi qyzmet etýge ýaǵdalasty.