QMDB JANYNAN JASTAR KEŃESI QURYLDY (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanulynyń bastamasymen múftııat janynan Jastar keńesi quryldy.
Keńestiń alǵashqy otyrysyna arnaıy qatysqan Bas múftı Naýryzbaı qajy Taǵanuly: «Jastyq shaq – adam balasynyń qaıta aınalyp kelmeıtin kóktemi bolsa, búgingi jastar – erteńgi aqyl aıtar aǵa, urpaq tárbıeleıtin dana, eldiń aqsaqaly men aqjaýlyqty anasy. Al olar danalyqqa jetýi úshin qazirgi altyn ýaqyty arzan nársemen ótip ketpeýi tıis.
El bolashaǵy sanalatyn jastarmen jańasha tásilder arqyly jumys isteıtin ýaqyt keldi. Men jyl basynda din qyzmetkerlerine arnaǵan Baǵdarlyq baıandamamda óskeleń urpaq ókilderimen jumysty jandandyrý úshin ár salanyń bilikti mamandaryn ortaq maqsatqa jumyldyratyn «Jastar keńesin» qurýdy tapsyrǵan bolatynmyn. Birneshe jyldan beri din men dástúrimizdi jastar arasynda dáriptep júrgen Qazaqstan musylmandary dinı basqarmasynyń Jastar isi sektory ártúrli formattaǵy is-sharalardy belsendi jas býynnyń atsalysýymen atqaryp keledi. Endi keńes qurylǵannan keıin jastarmen jumys odan saıyn damyp, jańa bir deńgeıge kóteriledi degen senimdemin» dedi.
Jastar keńesiniń alǵashqy otyrysyna qatysqan túrli salanyń tanymal ókilderi keńes jumysyn damytýǵa qatysty usynys-pikirlerin bildirdi. Sonymen qatar jas býyn ókilderin jat ádetterden saqtandyrý baǵytyndaǵy oılaryn bólisti.
