QMDB: JYLDY QORYTYNDYLAÝǴA ARNALǴAN TÓRALQA MÁJILISI BASTALDY (FOTO)
Elordada Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń jetekshiligimen 2025 jyldy qorytyndylaýǵa arnalǵan Tóralqa májilisi bastaldy.
Jıyn qasıetti Quran Kárim aıattaryn oqýmen ashylyp, Bas múftı el amandyǵy men tynyshtyǵy úshin duǵa tiledi. Sondaı-aq, QMDB Tóraǵasy elimizdiń ár óńirinen kelgen ókildikterdiń bas ımamdary men din qyzmetkerleriniń bir jyl boıy atqarǵan eńbegine oń baǵa berip, aldaǵy qyzmetterine sáttilik tiledi.
Bas múftı óz sózinde jyl basynda barsha din qyzmetkerlerine joldanǵan dástúrli «Baǵdarlyq baıandamany» aıasynda dinı salada basymdyq beriletin tórt baǵyt bekitilgenin atap ótti. Sondaı-aq jyldyq josparmen qatar «Aıtýly sharalar» jospary belgilenip, naqty mindetter júktelgenin jetkizdi. 2025 jyldyń dinı sala aıasynda «Islam jáne otbasy qundylyǵy» jyly bolyp jarııalanǵany da erekshe atalyp ótildi.
«Allaǵa shúkir, bıyl Astanada VI Respýblıkalyq ımamdar forýmyn sátti ótkizip aldyq. Forýmda otbasy qundylyǵyna, Qudaıy as berýde ysyrapqa jol bermeýge qatysty birqatar qujattar qabyldadyq. Qarılar alqasyn quryp, halyqaralyq jáne respýblıkalyq deńgeıde Quran jarysyn abyroımen ótkizdik. Birqatar musylman memleketterimen ortaq memorandýmdarǵa qol qoıyldy. Doha qalasynda Qatar Damý qorymen jasalǵan kelisim nátıjesinde Astanadaǵy «Ábý Nasr ál-Farabı» meshitin qaıta jańǵyrtýǵa jáne rýhanı ortalyq salýǵa qol jetkizdik», - dedi Bas múftı.
Sondaı-aq «Múftııat» baspasynan «Islam Entsıklopedııasy» kitabynyń 2–3 tomdary jaryq kórdi. Din qyzmetkerleri arasynda «Ádemi áýezdi azanshy», «Úzdik ımam» atty ıntellektýaldyq bilim saıystary uıymdastyryldy. Budan ózge de birqatar mańyzdy is-sharalar tabysty júzege asty.
Bas múftı atalǵan ıgi bastamalardyń nátıjeli oryndalýyna Ortalyq apparat qyzmetkerleri, oblys bas ımamdary men barsha din qyzmetkerleriniń súbeli úles qosqanyn atap ótip, alǵys bildirdi.
Aıta keteıik, májilis aıasynda Qazaqstan musylmandary dinı basqarmasynyń elimizdiń ár óńirindegi ókildikteriniń bas ımamdary 2025 jyly atqarylǵan jumystar boıynsha esep beredi.
