QOǴAMMEN BAILANYS: 2000-NAN ASTAM IS-ShARA UIYMDASTYRYLDY
Qazaqstan musylmandary dinı basqarmasy qoǵammen baılanysqa udaıy kóńil bólip keledi. Osy baǵytta jyl basynan beri 2000-nan astam is-shara atqaryldy. Bul týraly QMDB Qoǵammen baılanys bóliminiń meńgerýshisi Nurbek Esmaǵanbet aıtty.
Keńeıtilgen Ortalyq apparat jınalysynda Nurbek Áýeshanuly «Qoǵammen baılanys» baǵytynda qańtar-tamyz aılarynyń esebin Bas múftı Naýryzbaı qajy Taǵanulyna baıandady.
«Dinı basqarma 2022 jyldy «Islam – yntymaq pen birlik dini» dep jarııalap, osyǵan oraı aýqymdy is-sharalar atqaryldy. QMDB janynan respýblıkalyq Aqsaqaldar keńesi qurylyp, alǵashqy forýmy elordada, Batys óńiri aqsaqaldarynyń forýmy Aqtaý qalasynda uıymdastyryldy. Qoǵamdaǵy dinı máselelerdi talqylap, olardyń sheshý jolyn qarastyratyn Sarapshylar keńesi qurylyp, kúni búginge deıin úsh májilisi ótti. Budan bólek kópke tanymal blogerler jáne BAQ ókilderiniń Bas múftımen beıresmı kezdesýleri uıymdastyryldy» dedi bólim meńgerýshisi.
Sondaı-aq Nurbek Áýeshanuly «Qoǵammen baılanys» baǵytyna qarasty Qajylyq, Meshit isteri bólimi men «Halal Damý» mekemesiniń jumys esebin de baıandap ótti.
«Eki jyldyq úzilisten keıin bıyl qajylyq maýsymy qaıta jandanyp, elimizden úlken qajylyqqa 4000 adam bardy. 530-ǵa jýyq meshitte qajylyq pen umraǵa nıettengen jamaǵatqa qasıetti sapar negizderin úıretetin arnaıy kýrstar uıymdastyryldy. «Tawaf Travel» kompanııasy arqyly 391 adam umraǵa, 295 adam úlken qajylyqqa baryp keldi.
Bıyl elimiz boıynsha 57 meshit jamaǵat ıgiligine paıdalanýǵa berilse, 241 meshittiń qurylysy júrip jatyr. Jyl basynan beri 335 kásiporyn «Halal Damý» sertıfıkatyn ıelense, 216 kásiporyn sertıfıkatyn jańartqan. «Halal – sharıǵat talaby» anyqtamalyq quraly «Muftyat» baspasynan jaryq kórdi. Android jáne App Store júıelerinde «Halal Guide» mobıldi qosymshasy iske qosyldy, sondaı-aq «QMDB Halal» oqytý ortalyǵynda qyzmetkerlerdiń biliktiligin arttyrý kýrstary úzdiksiz júrgizilýde» dedi ol.
