Qonaev qalasynda QMDB ókildigi ashylyp, bas ımam taǵaıyndaldy (FOTO)
Qazaqstan musylmandary dinı basqarmasynyń tóraǵasy Naýryzbaı qajy Taǵanulynyń buıryǵymen múftııattyń Qonaev qalasynda arnaıy ókildigi ashylyp, jańadan qurylǵan Almaty oblysynyń bas ımamy taǵaıyndaldy.
«Qazaqstan musylmandary dinı basqarmasynyń Almaty oblysy, Almaty óńiri boıynsha ókildigi jańadan qurylǵan Almaty oblysynyń Qonaev qalasyna aýystyrylsyn» delingen Bas múftı buıryǵynda.
Sondaı-aq QMDB Tóraǵasynyń buıryǵymen osyǵan deıin Almaty ortalyq meshitinde naıb ımam qyzmetin atqarǵan Madııar Pirimqulov Almaty oblysynyń bas ımamy bolyp taǵaıyndaldy.
Búgin, qasıetti jumada QMDB Tóraǵa orynbasary Kenjeáli Myrzabaev Qonaev qalasynda jamaǵatqa jańa ımamdy tanystyryp, Bas múftı buıryǵyn oqyp berdi. Sonymen qatar osyǵan deıin atalǵan óńirde ımamdyq qyzmet atqarǵan Qýanysh Narjanov pen Aldajar Seıitulyna Bas múftı alǵys hatyn tabystap, qurmet kórsetip, ıyǵyna shapan japty.
