«QOJA AHMET IaSSAÝI HÁM IHSAN ILIMI» TAQYRYBYNDA HALYQARALYQ KONFERENTsIIa ÓTÝDE (FOTO)
Búgin Shymkent qalasynda Qazaqstan musylmandary dinı basqarmasynyń uıymdastyrýymen «Qoja Ahmet Iassaýı hám ıhsan ilimi» taqyrybynda halyqaralyq ǵylymı-tanymdyq konferentsııa ótýde.
Konferentsııa jumysyna Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly, Shymkent qalasy ákiminiń birinshi orynbasary Shyńǵys Muqan, Ózbekstan musylmandary dinı basqarmasynyń tóraǵa orynbasary, naıb múftı Ibrahım Inomov (onlaın), Qyrǵyzstan musylmandary dinı basqarmasynyń tóraǵa orynbasary, naıb múftı Abıbılla ajy Qydyrberdıev (onlaın), belgili ǵalym, professor Dosaı Kenjetaı, fılologııa ǵylymdarynyń doktory, professor Shámshedın Kerim, PhD doktor Muhan Isahan t.b. ǵalymdar men ımamdar, al ózge aımaqtardaǵy din qyzmetkerleri onlaın rejımde qatysýda.
Konferentsııada baıandama jasaǵan Bas múftı Naýryzbaı qajy Taǵanuly: «Qudireti kúshti Alla Taǵala Quran Kárimde erekshe mán bergen qundylyqtyń biregeıi – ıhsan ilimi. Eger musylman adam ıhsan iliminiń shynaıy bolmysyn túsinse, rýhanı jan-dúnıesi kemeldenip, ıman baılyǵyna qol jetkizedi.
Ihsan ilimi áýeli Allaǵa ıman keltirý, buıyrǵan amaldaryn oryndaý, tyıym salǵan nárselerinen boıyn aýlaq ustaýdan bastalady. Ihsan – sen Allany kórmeseń de Alla seni kórip turǵandaı amal jasaý degen sóz. Izgi ǵulamalarymyz «Ihsan iliminiń alǵashqy sabaǵy renjitpeýden bastalyp, sońy renjimeýmen aıaqtalady» degen eken.
Ózderińizge málim, Qazaqstan musylmandary dinı basqarmasy birneshe jyldan beri elimizdegi musylman jamaǵatyna ıhsan ilimin dáriptep keledi. Biz osy bastama aıasynda «Ihsan – rýhanı tárbıe negizi» kitabyn shyǵardyq. Saıyp kelgende, bizdiń maqsatymyz – dástúrimizben biteqaınasqan dinimizdi, ádet-ǵurpymyzdy dáriptep, jastardy babalar salǵan sara jolmen júrýge úndeý» dep atap ótti.
