QURAN KÁRIMDI JATQA OQÝDAN QYZDAR ARASYNDA II RESPÝBLIKALYQ BAIQAÝ ÓTEDI

Qazaqstan musylmandary dinı basqarmasynyń uıymdastyrýymen Quran Kárimdi jatqa oqýdan qyzdar arasynda II respýblıkalyq baıqaý ótedi.

Alla Taǵala Quran Kárimde ıgilikte jarysýdy buıyrǵan bolatyn. Iaǵnı Allanyń kálamyn jattaý men oqý arqyly jarysýǵa úndedi. Haq Taǵalanyń osy úndeýin oryndaý maqsatynda, Qazaqstan musylmandary dinı basqarmasy 2016 jyly Almaty qalasynda Qurandy jatqa oqýdan qyzdar arasynda tuńǵysh respýblıkalyq baıqaý ótkizgen bolatyn. Endi mine, ekinshi baıqaý 9-10 naýryz aralyǵynda el astanasy Nur-Sultan qalasynda ótkiziledi.

Qyzdar arasynda Quran Kárimdi jatqa oqýdan II respýblıkalyq baıqaý qarılardyń Quran Kárimdi oqý jáne jattaý deńgeıin kóterý, ózara tájirıbe almasý, musylman jamaǵatynyń quranı saýatyn kóterý arqyly qoǵamnyń rýhanııatyn arttyrý maqsatynda uıymdastyrylyp otyr. Jarysqa qatysýshy qyzdar Qurannyń 30, 20, 10 jáne 5 para nomınatsııalary boıynsha baq synaı alady. Úmitkerdiń qujattary 2022 jyldyń 21 aqpanyna deıin qabyldanady.

Úmitker qyzdarǵa qoıylatyn talaptar:

– úmitkerdiń Qazaqstannyń azamaty bolýy mindetti;
– úmitkerdiń jasy 30-dan aspaǵan bolýy qajet;
– úmitker bir nomınatsııaǵa ǵana qatysa alady;
– ár nomınatsııada talap etiletin paralardy tolyq jattaýy tıis;
– jarysqa qatysýshynyń jattaǵan paralary tolyq bolýy kerek, ıaǵnı eki jerden jarty-jarty parany biriktirip usynýǵa bolmaıdy;
– jarysqa qatysý qujattaryn uıymdastyrýshylar belgilegen merzimde tapsyrýy kerek;
– úmitker óz oblysyndaǵy QMDB ókildiginiń joldamasymen kelýi shart;
– ár oblystan bir nomınatsııaǵa bir úmitker usynylady (barlyǵy 4 úmitker);
– Qurandy jatqa oqý nomınatsııasy boıynsha respýblıkalyq jarystardyń júldegerleri jarysqa qatysa almaıdy.

Úmitker qyzdardan talap etiletin qujattar:

– anketa (bekitilgen úlgi boıynsha);
– jeke kýálik (pasport) kóshirmesi;
– QMDB-nyń óńirdegi bas ımamynyń usynys haty (joldamasy).

Baıqaýdyń nomınatsııalary:

Qurandy tolyq jatqa oqý
1-oryn (1 300 000 teńge)
2-oryn (1 000 000 teńge)
3-oryn (700 000 teńge)

Qurannyń 20 parasyn jatqa oqý
1-oryn (800 000 teńge)
2-oryn (600 000 teńge)
3-oryn (500 000 teńge)

Qurannyń 10 parasyn jatqa oqý
1-oryn (500 000 teńge)
2-oryn (300 000 teńge)
3-oryn (200 000 teńge)

Qurannyń 5 parasyn jatqa oqý
1-oryn (300 000 teńge)
2-oryn (200 000 teńge)
3-oryn (100 000 teńge)

Jalpy júlde qory: 6 500 000 teńge

Uıymdastyrýshylar:
Qazaqstan musylmandary dinı basqarmasy;
QMDB Nur-Sultan qalalyq ókildigi;
QMDB-nyń oblystardaǵy ókildikteri.

Qosymsha suraqtar úshin:
Jándillá Mamythanuly (+7 701 477 07 17)