QURBAN-2023 QORYTYNDYSY: QMDB 123 594 JANUIaǴA QURBANDYQ ETIN ÚLESTIRDI (FOTO)
QMDB Tóraǵasy, Bas múftı Naýryzbaı qajy Taǵanulynyń bastamasymen respýblıka kóleminde «Qurban-2023» qaıyrymdylyq aktsııasy joǵary deńgeıde uıymdastyryldy.
28-30 maýsym aralyǵynda ótken musylmandardyń ulyq merekesi – Qurban aıt kúnderi Qurban2023.kz saıtyna tapsyrys berý arqyly onlaın jáne jergilikti qasaphanalarda oflaın formatta qurban shalyndy. Merekege oraı arnaıy qurylǵan jumys shtaby qurban shalý rásimderin respýblıka kóleminde uıymdastyrýdy qolǵa alyp, búginde júıeli jumysyn sátti aıaqtap otyr.
Qoryta aıtsaq, elimiz boıynsha Qurban aıt kúnderi Qurban2023.kz saıtyna 1 842 tapsyrys berilse, 2 181 muqtaj otbasydan et alý jóninde ótinish kelip túsken. Respýblıka boıynsha uzyn sany 2253 adamnan quralǵan birneshe shtab qurylyp, 31 qasaphanada 283 qasapshy tapjylmaı jumys istedi.
Elimiz boıynsha qurban shalý rásimi barysynda jalpy sany 35 320 mal soıylsa, onyń 29 663-i – qoı, 2 425-i – eshki, 3 196-sy – sıyr, al túıe sany – 36. Osylaısha 1 104 tonna et 123 594 otbasyǵa din qyzmetkerleri jáne eriktilerdiń kómegimen jetkizilip berildi. Qurbandyq eti arnaıy mekemelerge de taratylǵanyn aıta ketken jón. Máselen keıbir óńirlerde múgedekter qory, zaǵıptar qory, aýrýhanalar men ardagerlerge eriktiler qurban etin esiginiń aldyna deıin aparyp berdi.
Osy oraıda Qazaqstan musylmandary dinı basqarmasy barsha din qyzmetkerlerine, ımamdarǵa, qurban shalýdy onlaın jáne oflaın formatta júzege asyrýǵa járdemdesken Aqparat jáne qoǵamdyq damý mınıstrligi, oblystyq, jergilikti ákimdikter jáne qurban shalý rásimine atsalysqan barsha aqjúrek azamattarǵa, jany jomart kásipkerler men eriktilerge sheksiz alǵysyn bildiredi. Elimiz túrli aýyrtpashylyq pen indet ataýlydan aman bolyp, jyldan esen aıttan aıtqa jete bergeı! Alla Taǵala bizden jáne sizderden qabyl etsin!
