QURBAN AIT: QASAPShYLARǴA ARNALǴAN SEMINAR ÓTTI
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń tapsyrmasymen qasapshylarǵa arnalǵan respýblıkalyq onlaın oqý-semınary ótkizildi.
«Qasapshylyq – saýapty hám jaýapty is» semınaryna naıb múftı, Sharıǵat jáne pátýa bóliminiń meńgerýshisi Sansyzbaı Qurbanuly, Ýaǵyz-nasıhat bóliminiń meńgerýshisi Batyrjan Berdenuly, «Halal Damý» dırektory Aıbek Asqarbekuly jáne elimizdiń barlyq óńirinen 150-ge jýyq qasapshy qatysty.
Semınarda barlyq óńirde qurbandyq shalynatyn oryndardy ázirleý, qaýpisizdik-tazalyq sharalary, qasapshylar daıarlaý jáne olarǵa qurban shalýdyń sharıǵı úkimderi men talap-sharttary keńinen túsindirildi, halal standartqa saı mal baýyzdap, et óńdeý tártibi aıtyldy.
Bas múftıdiń orynbasary Sansyzbaı Qurbanuly: «Alla Taǵala Quranda: «Senderge: ólekse, aqqan qan, dońyz eti jáne Alladan basqanyń atymen baýyzdalǵan mal haram qylyndy. Jáne býynyp, urylyp, qulap, súzilip ólgen maldar jáne jyrtqysh jegen mal haram…» Bulardyń bárin jeýge bolmaıdy, «… biraq (jany shyqpaı) baýyzdalǵandardan basqa» degen. «Paıǵambarymyzdyń (oǵan Allanyń salaýaty men sálemi bolsyn): «Alla Taǵala barlyq nárseni jaqsylap isteýdi buıyrdy, sondyqtan maldy soısańdar, durystap soıyńdar», – degen sózi bar. Maldy Alla Taǵala adam yrzyǵy úshin jaratqan desek te onyń baýyzdaý tártibi men mindeti bar. Qurbandyqty sharıǵat jolymen soımaıynsha halal bolmaıdy. Qazaq «shymshyq soısa da qasapshy soısyn» degen. Bir kózben qaraǵanda mal soıý – ońaı is sekildi. Alaıda kópshilik mán bere bermeıtin, sharıǵatymyzda bekitilgen, halal standartymyzda naqtylanǵan mal baýyzdaýdyń ózindik talaptary men erekshelikteri bar, olarǵa óte muqııat bolyńyzdar» – dep atap ótti.
Óz kezeginde Batyrjan Berdenuly Qurban aıttyń sharıǵı maǵynasy men tarıhyna jáne qurbandyq shalý kezinde kezdesetin qatelikterge toqtalyp, qurbandyq shalý úlken qulshylyq ekendigin jetkizdi. Semınar sońynda qatysýshylar tarapynan qoıylǵan suraqtarǵa jaýap berildi.
