Qurban shalýǵa qatysty týyndaǵan túıtkildi máseleler boıynsha QMDB túsindirmesi

Qazaqstan musylmandary dinı basqarmasynyń qoǵam aldyndaǵy negizgi 4 qyzmetiniń biri – qaıyrymdylyq sharalaryn uıymdastyrý. QMDB kómekke muqtaj jandardy qoldaý, qaýipti indetti aldyn alý maqsatynda WWW.QURBAN2020.KZ saıtyn iske qosty.

Joba maqsaty – qaıyrymdylyqqa dáneker bolý, halyqtyń densaýlyǵy men ómirine tóngen qaýipti seıiltýge úles qosý, qurban shalýǵa nıet bildirgen jandarǵa karantın jaǵdaıynda ońtaıly jol usyný, t.b. Osy rette tómendegi jaıttardy qosymsha túsindirip otyrmyz.

Birinshiden, bul – ýákildik qurbandyq. Sharıǵat boıynsha adam óziniń atynan basqa kisini belgili bir iske ýákil ete alady. Óıtkeni, adam balasy keıbir jaǵdaıda bir isti oryndaýǵa múmkindigi bolmaı qalady. Osy kezde bireýdiń kómegine júginedi, ıaǵnı sol isti oǵan tapsyrady, ony óziniń atynan ýákil etedi. Birde Paıǵambarymyz (oǵan Allanyń salaýaty men sálemi bolsyn) Hakım ıbn Hızam (odan Alla razy bolsyn) arqyly qurbandyq satyp alýǵa tapsyrys beredi. Biz osy oqıǵadan sharıǵat boıynsha ýákilge tapsyrys berý arqyly qurban shaldyrýǵa bolatynyn anyq ańǵaramyz. 

Karantın jaǵdaıynda qalada turyp jatqan azamattar úshin qashyqtyqtan óz atynan qurban shalýǵa tapsyrys berý – ońtaıly sheshim.

Ekinshiden, aýyldyq jerde jeke turǵyn úıde turatyn ár adamnyń musylmandyq mindetin atqarýyna QMDB tarapynan eshqandaı shekteý joq ekenin jetkizemiz.    

Úshinshiden, hanafı mázhabynda qurban aıt kúnderi baı adamǵa qurban shalý – ýájip (mindet). Ol úshin mal-dúnıesi nısap mólsherine jetý qajet, ıaǵnı keminde 40 qoıy nemese 30 qaramaly nemese 5 túıesi nemese qajettiliginen artyq 85 gr altyny (1 mln 285 myń teńge) bolý kerek. Sharıǵatymyz mal-dúnıesi nısap mólsherine jetpegen, ıaǵnı jaǵdaıy joq musylmanǵa qurban shalýdy mindettemeıdi.

Tórtinshiden, búginde respýblıka boıynsha qurbandyq etin alýǵa ótinish bildirgen adam sany qurban shalýǵa tapsyrys berýshilerden birneshe ese asyp tústi. 2020 jyldyń 29 shildesindegi saǵat 10:00 boıynsha naqty resmı statıstıkalyq málimet mynadaı: WWW.QURBAN2020.KZ saıtyna qurban shalýǵa tapsyrys bergender sany 906 adam, al qurbandyq etin alýǵa ótinish bildirgender sany 12 929 adam.   

QMDB bul jaǵdaıǵa qaramastan táýekeldi túrde sheship qabyldap, eń bastysy Alla razylyǵy úshin et alýǵa ótinish bildirgen azamattardyń ótinish hatyn qabyldaý jumysyn toqtatqan joq. WWW.QURBAN2020.KZ saıty qaıyrymdylyq jasaý baǵytynda ashyldy. Sondyqtan bul jobany joǵary deńgeıde júzege asyrý – úlken saýapty istiń biri.

Besinshi, QMDB qarjyǵa aralaspaıdy. Mal baǵasy jergilikti naryq baǵasymen kórsetildi. Elimizdiń ár aımaǵyndaǵy maldyń baǵasy ártúrli. Nur-Sultan, Almaty, Shymkent qalalary men oblys ortalyqtaryndaǵy mal baǵasy ártúrli deńgeıde. Jaǵdaıǵa baılanysty qoljetimdi baǵamen toqtyny da qurbandyqqa shalýǵa bolady.  

 Tapsyrys berýshiden túsken qarajat mal ıesine, ıaǵnı satýshyǵa tikeleı beriledi. Óıtkeni bul deldaldyq qyzmet emes. Kórsetilgen somaǵa qasapshynyń qyzmeti ǵana kiredi. Al qurbandyq etin bólshektep, muqtaj jandarǵa taratý syndy barlyq uıymdastyrý jumystary meshit jamaǵaty men eriktilerdiń kómegi arqyly tegin júzege asady. Bul qurban shalýǵa tapsyrys berýshi azamattar úshin úlken jeńildik.

Altynshy, saıt arqyly tapsyrys qabyldap, qurbandyq etin kómekke zárý jandarǵa taratý tájirıbesi Túrkııa, Malaızııa, Indonezııa, Birikken Arab Ámirlikteri syndy birqatar musylman memleketterinde burynnan qalyptasqan júıe. Bul jyl saıynǵy ıgi dástúrge aınalǵan. Jobanyń basty ereksheligi – qurbandyq etin túgeldeı muqtaj azamattarǵa taratý.

Jetinshi, atalǵan joba sanıtarlyq talaptardy saqtaı otyryp, halyqtyń ómiri men densaýlyǵyn saqtaýdy kózdeıdi. Sonymen qatar joba maqsaty – kómekke asa zárý azamattardy qoldap, olarǵa ulyq meıramda qýanysh syılaý, az da bolsa qaıǵy-muńyn seıiltý. Qurbandyq shalýdyń negizgi máni osy.

Qurbandyq etin muqtaj jandarǵa úlestirý arqyly musylmandar arasynda mahabbat pen súıispenshilik artady. Sonymen qatar óziniń boıyndaǵy qatygezdik, sarańdyq syndy sıpattardan arylyp, ony meıirimdilik, jomarttyq, kishipeıildik qasıetterge aýystyrady.

Alla Taǵala shalǵan qurbandyǵymyzdy, bergen sadaqamyzdy qabyl etip, saýabyn arttyrsyn. Elimiz aman, jurtymyz tynysh bolsyn! Ámın!