QYZYLORDADA «BABALAR SÓZI – DANALYQ KÓZI» DINI JYRLAR RESPÝBLIKALYQ FESTIVALI ÓTTI (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Qyzylorda oblysyndaǵy jumys sapary barysynda oblys ortalyǵynda ótken «Babalar sózi – danalyq kózi» respýblıkalyq jyrshylar festıvaline qatysty.
Bas múftı óz sózinde mundaı minájat jyrlardyń umytylyp bara jatqandyǵyn aıtyp, ony jańǵyrtý qajettigin jáne kóne dinı óleńderdi qaıta nasıhattaýǵa kóńil bólý jaıyna toqtaldy.
«Minájat degenimizdiń ózi duǵa etý, jalbaryný, únsiz tilek tileý. Ózine qajetin Alladan surap, keshirim tilep, Allany madaqtaý arqyly oıshyldar, shaıyrlar men jyraýlar, aqyndar ártúrli kezeńde minájat jyrlaryn jazyp otyrǵan. Bastan aıaq Allaǵa arnalǵan jyrlardy Minájatnama dep ataımyz. Odan bólek Paıǵambarymyzǵa da arnap óleńder jazyldy. Paıǵambarymyzdyń ózin emes, onyń súnnetin de jyrǵa qosty. Shuǵylaly jolmen qazaq halqy da júrip, týra joldy silteýshi Paıǵambaryn júrekten shyqqan jyrlaryna qosqany málim. Bul jyr, óleń joldarynyń bári Allaǵa, onyń Elshisine degen súıispenshilikten týǵan dúnıe dep qabyldaımyz. Búgingi respýblıkalyq minájat jyrlar festıvaliniń qatysýshylaryna Alla jar bolsyn» dep izgi tilegin jetkizdi. Sondaı-aq oblys ákiminiń orynbasary Nurymbet Amanuly da qatysýshylarǵa sáttilik tilep, dinı óleńderdi kóbirek nasıhattaý kerek ekenin aıtty.
Aıta keteıik, elimizdiń birneshe aımaǵynan kelgen ónerpazdardyń qatysýymen ótken baıqaý Omar Shoraıaqulynyń 145 jyldyǵyna arnaldy. Negizgi taqyryp – dinı jyrlardy óz shyǵarmasyna arqaý etý. 20 qatysýshy baǵyn synaǵan festıval barysynda barlyq ónerpazǵa QMDB Tóraǵasynyń alǵys haty tabystalyp, arnaıy qarjylaı júlde berildi.
