Radıobaǵdarlamalar ramazanǵa arnalady (FOTO)
QMDB Tóraǵasy, Bas múftı Naýryzbaı qajy Taǵanulynyń tóraǵalyǵymen ótken orazanyń birinshi aptasyn qorytyndylaýǵa arnalǵan jıynda Dinı basqarmanyń bólim basshylary Ramazannyń alǵashqy aptasynda atqarylǵan is-sharalardyń esebin tanystyrdy.
Aqparat jáne qoǵammen baılanys bóliminiń meńgerýshisi Marat Bektazınov: «Byltyr «Qazaqstan» arnasynan bastaý alǵan QMDB men Ulttyq arnanyń birlesken jobasy «Oraza qabyl bolsyn!» habary bıyl da Efırge shyqty. Habardyń alǵanshy qonaǵy bolyp QMDB Tóraǵasy, Bas múftı Naýryzbaı qajy Taǵanuly qatysty. Odan bólek habarǵa kúndelikti QMDB Ǵulamalar keńesiniń músheleri, bólim basshylary men meshit ımamdary qatysyp, Ramazan aıy men orazaǵa qatysty turǵyndar saýalyna jaýap beredi» dedi.
Sondaı-aq Marat Bektazınov pitir sadaqaǵa qatysty qoǵamda alańdatýshylyq týdyrǵan suraqtarǵa da jaýap berilgenin, QMDB Sharıǵat jáne pátýa bóliminiń meńgerýshisi Sansyzbaı Qurbanulymen «Pandemııa jaǵdaıyndaǵy oraza» atty beınesuhbat túsirilgenin atap ótti.
«Budan bólek qasıetti aıda Erbolat Saparovtyń júrgizýimen «Qazaq radiosy» ár juma saıyn saǵat 10:10-da tikeleı Efırdegi «Yqylas» radıobaǵdarlamasynyń taqyryptaryn Ramazan máselelerine arnamaq. Sondaı-aq, «Qazaq radiosy» Efırindegi kún saıyn beriletin tańǵy «Qaıyrly tań, Qazaq eli!» baǵdarlamasynan «Berekeli Ramazan» aıdary ashyldy jáne de «Shalqar» radıosynda ár juma saıyn 12:00-de tikeleı Efırge shyǵatyn «Otandy súıý» baǵdarlamasy «Ramazan – aılardyń sultany» taqyryptaryna arnalmaq. QMDB-nyń resmı paraqshalary da Ramazan aıynda oqyrmandar nazarynan tys qalmady. Erkin Shákirulynyń júrgizýimen kún saıyn saǵat 19:00-de @muftiyatkz ınstagram paraqshasy men MÝFTIIaT QMDB YouTube arnasynda «30 kúnniń berekesi» atty rýhanı-tanymdyq baǵdarlama jaryqqa shyǵyp jatyr. Ár kúngi Efır ertesinde «Halyq arna» telernasynan kórsetilýde» dedi.
Al «MUFTIYAT» baspasynyń dırektory Murat Ábdihalyqov jıynda Ihsan ilimi baǵyty boıynsha atqarylǵan jumystarǵa toqtaldy. «Osy aıda QMDB-ǵa qarasty Qaraǵandy ókildiginiń uıymdastyrýymen «Rýhanı kemeldik jáne oraza qundylyqtary» kitaby 1000 danamen, Aqtóbe oblysy ókildiginiń jetekshiligimen Ramazan aıyna oraı «Orazaǵa qatysty 150 suraq» atty kitapsha qazaq jáne orys tilderinde 17 000 danamen «Mýftııat» baspasynan jaryq kórdi. Sonymen qatar saıttarda, respýblıkalyq, oblystyq, aýdandyq gazetterde, ıhsan ilimine qatysty 316 maqala jaryq kórdi. Áleýmettik jelilerde 665 jazba-ınfografıka, 609 ýaǵyz-dárister taspalanyp, jelilerge salyndy. Sondaı-aq onlaın, oflaın 173 is-shara (dóńgelek ústel, semınar, kezdesýler) ótkizildi» dep atap ótti Murat Ábdihalyqov.
