RAMAZAN-2026: 699 MEShITTE QURAN HATYM OQYLÝDA

Bul týraly búgin Bas múftı Naýryzbaı qajy Taǵanulynyń tóraǵalyǵymen ótken Qazaqstan musylmandary dinı basqarmasynyń Tóralqa májilisinde Dinı bilim jáne kadr daıyndaý bóliminiń meńgerýshisi Hasan Amanqul habarlady.

«Ramazan aıynda elimizdegi 699 meshitte taraýyq namazynda Quran hatymy ótkizilýde. Onyń 513 meshitinde hatym Qadir túninde aıaqtalady. Hatym oqýǵa barlyǵy 920 qarı qatysýda.

Sonymen qatar «Hatym Quran» jobasy aıasynda 564 meshitte besin namazynan keıin jamaǵatpen birge kún saıyn 1 para Quran oqý uıymdastyrylyp, oǵan 15 425 adam qatysýda. Al «Bir kúnde bir hatym» jobasy boıynsha 513 top qurylyp, búginge deıin 2689 hatym Quran oqyldy.

Ramazan aıynda oqý-aǵartý jumystary da júıeli túrde júrgizilýde. Atap aıtqanda, 859 meshitte Quran oqý kýrstary uıymdastyrylyp, oǵan 10 719 adam qatysýda. Sonymen qatar 823 meshitte «Namaz oqyp úıreneıik» kýrstary ótkizilip, oqý baǵdarlamasyn 3672 adam tolyq aıaqtady.

Bilim saıystary da uıymdastyrylyp, «Ramazan – Quran aıy» taqyrybynda 82 meshitte 83 jarys ótkizilip, oǵan 1158 adam qatysty. Sonymen qatar 722 meshitte «Pátýa saǵaty» uıymdastyrylyp, 9345 azamattan 14 023 suraq qabyldanyp, tıisti jaýaptar berildi»,- deıdi Hasan Tashaıuly.

​