«Ramazan kerýeni» Aqtóbede jalǵasyn tapty (FOTO)

Qasıetti Ramazan aıyna oraı, Bas múftı Serikbaı qajy Oraz barsha halyqty jarylqaýshy aıda jaqsylyq jasaýǵa úndegen bolatyn. Bul qaıyrymdylyq sharasy – Aqtóbe jurtshylyǵynyń sol Úndeýdi qoldap, ún qatýy boldy. Elordamyzdaǵy respýblıkalyq «Áziret Sultan» meshitinen bastaý alǵan «Ramazan kerýeni» osylaısha Aqtóbe óńirinde óz jalǵasyn tapty.

19-mamyrda oblystyq «Nur Ǵasyr» meshitiniń uıymdastyrýymen jáne kásipker Ardaq Sadaqbaıulynyń demeýshiligimen «Ramazan kerýeni» jolǵa shyqty. Meshit alańyna qyzmetkerler men jamaǵat, eriktiler men belsendi jastar jınalyp, saýapty iske atsalysty.

Qaıyrymdylyq sharasy aqtóbelik tanymal ónerpazdardyń Jarapazanymen bastaldy. Bas ımam T.Ospan «Ramazan kerýeniniń» mańyz-maqsatyna toqtalyp, kásipker Ardaq Sadaqbaıulyna jurtshylyq atynan alǵys aıta kele kerýenge sáttilik tiledi.

Eske sala ketsek, beısenbi kúni – 16 mamyrda «Nur Ǵasyr» meshitinde Ótegenov Ardaq muqtaj 40 adamnyń árqaısysyna óz qolymen 25 myń teńgeden taratyp, jalpy 1 mıllıon teńge kóleminde qarjylaı zeketin úlestirip, kóptiń alǵysyn alǵan edi.

Saýapty iske atsalysýǵa nıet etken 30 aqtóbeliktiń kólikterine árqaısysy 25 kelilik azyq-túlik qorjyndary tıelip, oblys ortalyǵyndaǵy 120 muqtaj otbasynyń meken-jaılaryna qaraı kósh bastady.

«Ramazan kerýeniniń» alǵashqy legi múmkindigi shekteýli balalarǵa arnalǵan «Jaına» saýyqtyrý statsıonaryna kelip toqtap, ókil ımam balalardy emdeý ortalyǵyna 20 «Ramazan qorjynyn» tabystady.

Nur-Sultan ókildiginen «Ramazan kerýeni» qaıyrymdylyq Estafetasyn Aqtóbe ókildigi qabyldap, elimizdiń basqa oblystaryna joldaıdy. Barsha kásipker, jomart azamattardy qasıetti aıda jaqsylyq jasaýǵa shaqyramyz.