RANT múshesi – Almaty oblysynda
Almaty oblysyna QMDB Ýaǵyz-nasıhat bóliminiń mamany, ıslamtanýshy, RANT múshesi Dýman Saıfýlla arnaıy kelip, jergilikti jamaǵatpen kezdesti.
Alǵashqy shara barysynda Dýman Nádiruly Qapshaǵaı qalalyq kópsapalyq kolledjinde bolyp, stýdentterge ózekti taqyrypta nasıhat aıtty. Budan keıin RANT múshesi jergilikti Polıtsııa departamenti qyzmetkerlerimen kezdesip, olarǵa «Dástúrli emes dinı aǵymdardyń belgileri» taqyryby aıasynda aqparattyq-túsindirme jumystaryn júrgizdi.
Almaty oblystyq ortalyq meshitinde «Zııandy ádetterden aýlaq bol» taqyrybynda juma ýaǵyzyn aıtqan Dýman Nádiruly qazirgi ýaqytta jeke adamnyń ǵana emes, bútindeı qoǵam ómirine qater týdyryp otyrǵan zııandy ádetterdiń musylman adamǵa tán emestigin eske salyp, jınalǵan kópshilikke bul isterden barynsha aýlaq bolýǵa shaqyrdy.
Sondaı-aq RANT múshesi Almaty oblysy din isteri basqarmasynyń «Din saqshy» baǵdarlamasynda «Jan men tán tazalyǵy» taqyrybynda suhbat órbitse, LA-155/14 túzeý mekemesinde jazasyn óteýshilermen júzdesip, olardyń suraqtaryna jaýap berdi.
Al aqsham namazynyń aldynda Dýman Nádiruly Ile aýdandyq «Sábdenuly Ótegen batyr» meshitine kelgen jamaǵatqa áserli ýaǵyz-nasıhat aıtty.
Sapar qorytyndysynda Almaty oblysynyń bas ımamy Madııar Taǵaıbaıuly RANT múshesi Dýman Nádirulyna jergilikti din qyzmetkerleri men jamaǵattyń atynan alǵys aıtyp, atqarǵan is-sharalaryna rızashylyǵyn bildirdi. Islamtanýshy qatysqan ýaǵyz-nasıhat jumystaryna 4 myńǵa jýyq adam qamtylǵanyn aıryqsha ataı ketken jón.
