RÁTBEK QAJY NYSANBAIULY HAZRETTI AQTYQ SAPARǴA ShYǴARYP SALÝ RÁSIMI ÓTTI
Búgin Almaty Ortalyq meshitinde Qazaqstan musylmandary dinı basqarmasynyń tuńǵysh Tóraǵasy, 1990-2000 jyldary aralyǵynda Bas múftı qyzmetin atqarǵan elimizge belgili din qaıratkeri, marqum Rátbek qajy Nysanbaıuly hazretti aqtyq saparǵa shyǵaryp salý rásimi ótti.
Marqumnyń janaza namazyn Rátbek qajynyń shákirti, QMDB Tóraǵasy, Bas múftı Naýryzbaı qajy Taǵanuly oqyp, qaıǵy jamylǵan áýletke sabyr tiledi.
«Rátbek qajy haziret – Qazaqstan musylmandary dinı basqarmasynyń ǵana emes, halqymyzdyń úlken aqsaqaly edi. Zııarat etip barǵanymyzda árkez halyqtyń, eldiń tileýin tilep otyratyn. Marqumnyń tirshiligindegi barsha izgi amaldaryn Alla Taǵala qabyl etsin! Ardaqty Paıǵambarymyz (oǵan Allanyń salaýaty men sálemi bolsyn):
«Alla Taǵala qandaı da bir qulyna jaqsylyq bergisi kelse, ony qoldanady», – degen. Sonda adamdar: «Ýa, Allanyń elshisi! Ony qalaı qoldanady?» – dep suraıdy. Alla Elshisi: «Ol adamǵa dúnıeden óter aldyn izgi amal atqarýǵa kúsh-jiger beredi», – degen (ımam Termızı).
Hakim Abaı:
Kóp adam dúnıege boı aldyrǵan,
Boı aldyryp, aıaǵyn kóp shaldyrǵan.
Óldi deýge sııa ma, oılańdarshy,
Ólmeıtuǵyn artyna sóz qaldyrǵan, – deıdi.
Ustazymyzdyń jasaǵan qyzmeti, istegen izgi amaly qabyl bolyp, halqymyzdyń jadynda máńgi saqtalǵaı. Marqumnyń ımany joldas, jany jánnattyq bolsyn!», - dedi Bas múftı.
Sonymen qatar, rásim barysynda Qazaqstan Respýblıkasy Prezıdenti Qasym-Jomart Kemeluly Toqaevtyń Nysanbaevtar áýletine joldaǵan kóńil aıtý jedelhaty oqyldy.
Sondaı-aq jerleý rásiminde birqatar memlekettik tulǵalar men shet elderdiń din basshylarynan kelgen kóńil aıtý jedelhattary oqylyp, marqumnyń otbasyna tabystaldy.
As sońynda QMDB Tóraǵasynyń tapsyrmasymen elimizdegi Quran jattaý ortalyqtarynda 40 Quran hatym túsirilip, marqumnyń rýhyna baǵyshtalyp duǵa jasaldy.
Eske sala keteıik, osy apta basynda, 12 qańtar dinı basqarmanyń qurylǵan kúnine oraı Bas múftı Naýryzbaı qajy Taǵanuly Rátbek qajy Nysanbaıuly hazretti arnaıy zııarat etip, Islam dininiń dáriptelýine, dinı bilim men ǵylymnyń damýyna súbeli úles qosqan tulǵalarǵa beriletin QMDB-nyń eń joǵary marapattarynyń biri — «Sharapat» ordenimen marapattaǵan bolatyn.
