Sadaqanyń eń abzaly – ustazdyq etý
Qadirli ustazdar!
Barshańyzdy mereıli merekelerińiz – ustazdar kúnimen shyn júrekten quttyqtaımyn! Denińizge saýlyq, otbasyńyzǵa amandyq, urpaq tárbıesindegi ulaǵatty isterińizge bereke tileımin!
Adam balasynyń oılaý júıesi qalyptasa bastaǵan sátte ár nárseni tanyp-bilýge talpynady. Bilim adam keýdesine ózdiginen qonbaıdy. Ata-ananyń tárbıesi, ustazdyń úıretýi, izgi dostardyń kómegi arqyly balanyń bilim kókjıegi keńeıip, dúnıe-tanymy arta bastaıdy.
«Adamnyń adamshylyǵy ustazdan» dep Hákim Abaı aıtqandaı, boıyna parasattylyq pen baısaldylyq, danalyq pen kórkem minez qalyptastyra bilgen nemese óz salasynda belgili bir jetistikke jetken kez kelgen tulǵa ustaz tárbıesin alyp, tájirıbe jınaıdy. Ómirdiń osy bir ǵıbratty sátteri árkez jalǵasa bermek. Óıtkeni, ustazdyq etý – óz ýaqytyńdy aıamaý. Allaǵa unamdy isterdiń barlyǵyna mol saýap jazylady. Solardyń ishinde adam tárbıeleýdiń mańyzy úlken. Tárbıe isi – abyroıly jumys.
Ustazǵa qurmet kórsetý – adamgershilikten. Tárbıe berýshi tulǵany ardaqtap, oǵan syı-qurmet kórsetý de – saýapty is. Hazireti Álı (oǵan Alla razy bolsyn): «Kim maǵan bir árip úıretse, onyń quly bolýǵa daıynmyn» degen eken. Al mázhabymyzdyń negizin qalaǵan Imam Aǵzam Ábý Hanıfa ustazyna degen qurmetin bylaı jetkizedi: «Aramyzda jeti kóshe bolǵanyna qaramastan ádepsizdik bolmasyn dep ustazym Hamıdtiń úıine qaraı aıaǵymdy sozyp jatqan emespin. Qansha jyldan beri ár namazdan keıin ata-anammen qos ustazymdy da qaıyrly duǵama qosyp kelemin». Biz budan ustazǵa degen qurmettiń úzdik úlgisin kóremiz. Ustazyn qadirleı bilgen adam ózgege de qurmet kórsete alady.
Ardaqty Paıǵambarymyz Muhammed (oǵan Allanyń salaýaty men sálemi bolsyn) bir hadısinde: «Ilim úırenińizder, ilimge qajetti baıyptylyq pen baısaldylyqty da qosa úırenińizder. Sizderge ilim úıretken kisini qurmetteńizder, syılańyzdar» degen.
Baıyptylyq pen baısaldylyq – musylmanǵa tán sıpat. Ustazdarymyz shákirtke bilim berip qana qoımaı, ony ustamdylyqqa, danalyqqa úıretýi qajet. Ustamdy adam qandaı jaǵdaı bolsa da utylmaıdy.
Kóp jaǵdaıda sadaqa uǵymyn bireýge qarjylaı kómektesý, oǵan qaıyrymdylyq jasaý dep túsinip, osyndaı oımen shektelip jatamyz. Sadaqa sóziniń maǵynasy tereń, uǵymy keń. Sadaqanyń eń abzaly – ustazdyq etý. Alla elshisi (oǵan Allanyń salaýaty men sálemi bolsyn): «Sadaqanyń eń jaqsysy – ilim úırenip, ony basqalarǵa úıretý» degen. Allanyń bizge bergen qabiletin ilim úıretip, shákirt tárbıeleýge jumsaǵanymyz – sadaqa jasaǵanymyz.
Taǵy bir hadıste aıtylǵandaı, «adam qaıtys bolǵanda amal dápteri jabylady. Myna úsh kisiniń ǵana saýaby jalǵasa beredi: artynan duǵa joldaıtyn ıgi urpaq qaldyrǵan, el ıgiligine jaraıtyn dúnıe saldyrǵan, artyna ilim qaldyrǵan adam».
Artyna ilim qaldyrǵan adam úshin shákirti árdaıym duǵa jasap, jaqsylyq tilep júredi. Sondaı azamattardyń qatary kóbeısin dep tileımiz.
Alla Taǵala barsha ustazdarǵa jar bolyp, izgi amaldarynyń saýabyn eselep jazǵaı. Ámın!
Naýryzbaı qajy TAǴANULY
Qazaqstan musylmandary dinı basqarmasynyń tóraǵasy, Bas múftı
