«SARYAǴASh» MEDRESE-KOLLEDJINDE SEMINAR ÓTTI
Qazaqstan musylmandary dinı basqarmasyna qarasty Túrkistan oblysyndaǵy «Saryaǵash» medrese-kolledjinde shákirtterge arnalǵan oqý-semınary uıymdastyryldy. «Halal Damý» dırektory Aıbek Asqarbekulynyń jetekshiligimen ótkizilgen semınarǵa jergilikti ustazdar da qatysty.
Oqý-semınar barysynda sharıǵatymyzdaǵy halaldyń orny men mańyzy jóninde túsindirgen Aıbek Asqarbekuly: «Alla Taǵala adamzat balasyna kól-kósir nyǵmetter berip, jer betindegi halal men haram nárselerdiń ara jigin ajyratyp kórsetken. Alla pendesi úshin neni halal dese, ol syrda qaıyr men hıkmet bar, al neni haram dese, onda adam ǵumyry úshin ushan-teńiz zııannyń bar ekendigi kúmánsiz. Osy týrasynda Quran Kárimde: «Ýa, adamdar! Jer betindegi nárselerdiń halal ári tazasynan jeńder!», «Allanyń ózderińe halal ári taza etip bergen rızyqtarynan jeńder!» delingen», – dep halaldyń salmaǵy men mańyzy jóninde maǵulmat berdi.
Halal ónimder tehnologııasy men standart talaptary, «QMDB Halal» sertıfıkatynyń artyqshylyǵy men ereksheligi, zerthanalyq tekseristiń mańyzdylyǵy, taǵamdyq qospalardyń óndirisi jóninde baıandady.
Semınar sońynda, shákirtter tarapynan qoıylǵan suraqtarǵa jaýap berilip, Aıbek Asqarbekuly shákirtterdi halal ındýstrııasyn damytýǵa at salysýǵa shaqyrdy.
