Semeı turǵyny úıin «Ýaqyp» qoryna tapsyrdy (FOTO)
Semeı qalasynyń turǵyny ári meshit jamaǵaty Rahmetolla Quımanuly jomarttyq tanytyp, úıin jáne jer telimin «Ýaqyp» qoryna tapsyrdy.
Paıǵambarymyz (oǵan Allanyń salaýaty men sálemi bolsyn) hadısinde: «Jomart – Allaǵa, jánnatqa jáne halyqqa jaqyn, jahannamnan alys. Sarań – Alladan, jánnattan jáne el-jurttan alys, jahannamǵa jaqyn» degen bolatyn. Semeı qalasynyń turǵyny osy hadıske amal etkenin kórsetti.
Aıta keteıik, Semeı qalasyna arnaıy is-saparmen barǵan QMDB «Ýaqyp» qorynyń tóraǵasy Ardaq Núsiphanuly «Abaı Qunanbaıuly» ortalyq meshitiniń jamaǵatymen kezdesip, jomarttyqtyń qadir-qasıeti jaıly «Jomarttyq – Allaǵa, jánnatqa jaqyndatatyn izgi amal» taqyrybynda nasıhat jumysyn júrgizdi. «Ýaqyp» qorynyń basshysy Rahmetolla Quımanulynyń amanatyn qabyldap aldy.
