Serikbaı qajy Oraz Máskeýde Reseı múftıimen kezdesti (FOTO)
Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz bastaǵan delegatsııa Reseı Federatsııasyna resmı saparmen bardy. Sapardyń birinshi kúninde elimizdiń Bas múftıi Serikbaı qajy Satybaldyuly Reseı Federatsııasy musylmandary dinı basqarmasynyń tóraǵasy Ravıl Gaınýtdınmen kezdesti.
Kezdesý barysynda kórshiles elderdiń rýhanı-mádenı, dinı saladaǵy qarym-qatynasy sóz boldy. Qazaqstan men Reseı musylmandary Dinı basqarmalary arasyndaǵy áriptestik baılanystyń nyǵaıyp kele jatqandyǵy aıryqsha ataldy. Taraptar áńgime barysynda Qazaqstan musylmandary dinı basqarmasynyń bastamasymen naýryz aıynda ótken Eýrazııa musylman ǵulamalarynyń forýmy jaıly pikir almasty. Serikbaı qajy Oraz atalǵan halyqaralyq forým Ortalyq Azııa men Eýrazııa elderiniń din qaıratkerlerin ortaq maqsatqa úndep, birlikke shaqyrǵanyn tilge tıek etti.
Eki eldiń múftıleri ıgi isterde ózara birigip qyzmet etý, dinı radıkalızm men Ekstremızmniń qaýpin aldyn alý, qazirgi syn-qaterler men dinı máselelerge qatysty biryńǵaı pátýa shyǵarýdyń mańyzdylyǵy jóninde áńgimelesti. Osy baǵytta júıeli jumys júrgizip, birlesken is-sharalardy júzege asyrýǵa ýaǵdalasty.
Suhbat barysynda Eýrazııa musylman ǵulamalarynyń forýmy janynan qurylǵan Hatshylyq jumysyn jan-jaqty jetildirý máselesi talqylandy.
Resmı kezdesýden keıin Serikbaı qajy Oraz Máskeýdiń Ortalyq meshitine jınalǵan jamaǵatqa ramazan aıynyń qadir-qasıeti men musylman úmbetiniń birligi jaıly ýaǵyz aıtty.
