ShARIǴAT JÁNE PÁTÝA MAMANDARY 98 300 SURAQQA JAÝAP BERDI (FOTO)
Qazaqstan musylmandary dinı basqarmasynyń elimiz boıynsha sharıǵat jáne pátýa bólimi 8 aı ishinde 98 300 dinı suraqqa jaýap berdi. Bul týraly QMDB Sharıǵat jáne pátýa bóliminiń meńgerýshisi, naıb múftı Sansyzbaı Shoqanov aıtty.
Elordada ótken keńeıtilgen Ortalyq apparat jınalysynda Sansyzbaı Qurbanuly «Din men dástúr» baǵytynda qańtar-tamyz aılarynyń esebin Bas múftı Naýryzbaı qajy Taǵanulyna baıandady.
«Pátýa mamandary jeke kezdesý, áleýmettik jeliler jáne telefon arqyly aqıda, ǵıbadat, otbasylyq quqyq, múliktik qatynas jáne ártúrli dinı máseleler boıynsha suraqtarǵa jaýap berdi. Al dinı aqparat berý ortalyǵynyń mamandary segiz aıda 8010 saýalǵa jaýap berdi.
Sondaı-aq bıyl elimiz boıynsha «Din men dástúr» baǵytynda 466 maqala jazylyp, 417 aýdıo-vıdeo ónim ázirlense, ulttyq oıyndar dáriptelgen 822 is-shara uıymdastyryldy. Odan bólek erli-zaıyptylar jáne úılenýge nıettengen juptarmen 6900 kezdesý ótip, aqyl-keńes berildi», – dedi naıb múftı.
