«Shaurma Food» qyzmetkerlerine semınar ótkizildi
«QMDB Halal» oqytý jáne bilim jetildirý ortalyǵynda «Shaurma Food» fast-fýd dámhanasynyń basqarýshy dırektorlaryna oqý-semınar ótkizildi. Semınardy «Halal Damý» dırektory Aıbek Asqarbekuly men tehnolog Aızat Ermekqyzy júrgizdi.
Oqytý barysynda sharıǵatymyzdaǵy halaldyń orny men mańyzy jóninde túsindirgen Aıbek Asqarbekuly: «Alla Taǵalanyń uly sózderi qasıetti Quran Kárimde adamzat balasyna kól-kósir nyǵmetter berip, jer betindegi halal men haram nárselerdiń ara jigin ajyratyp kórsetken. Alla pendesi úshin neni halal dese, ol syrda qaıyr men hıkmet bar, al neni haram dese, onda adam ǵumyry úshin ushan-teńiz zııannyń bar ekendigi kúmánsiz. Osy týrasynda «Baqara» súresiniń 168-aıatynda bylaı dep túsindiredi: «Áı, adamdar! Jer betindegi nárselerdiń halal ári tazasynan jeńder!», «Máıda» súresiniń 88-aıatynda: «Allanyń ózderińe halal ári taza etip bergen rızyqtarynan jeńder!» delingen», – dep halaldyń salmaǵy men suraýy jóninde maǵulmat berdi.
Sondaı-aq tehnolog maman Aızat Ermekqyzy halal ónimder tehnologııasy men standart talaptary, zerthanalyq tekseristiń mańyzdylyǵy, taǵamdyq qospalardyń óndirisi jóninde baıandady.
Sonymen qatar, qatysýshylar tarapynan qoıylǵan suraqtarǵa jaýap berildi.
