Smaıyl Seıtbekov ımamdarǵa dáris oqydy (FOTO)
QMDB Tóraǵasy, Bas múftı Naýryzbaı qajy Taǵanulynyń bastamasymen Shymkent ortalyq meshitinde «Islam tarıhy: talas-tartys máseleleri» taqyrybynda rýhanı tanymdyq dinı semınary ótkzildi.
Semınarǵa QMDB Dinı bilim jáne kadr daıarlaý bóliminiń meńgerýshisi Smaıyl Seıtbekov arnaıy qatysyp, «Islam tarıhy: talas-tartys máseleleri» taqyrybynda ımamdarǵa dáris oqydy. Ádiletti tórt halıfanyń ómir joly men túrli kereǵar aǵymdardyń shyǵý tarıhy syndy ózekti taqyryptar qamtyldy. Óte qyzyqty hám tartymdy ótken semınardy qatysýshylar tapjylmaı tyńdap, kókeılerinde júrgen suraqtaryna tushymdy jaýap aldy.
Semınar barysynda Shymkent qalasynyń bas ımamy Baqdáýlet Nurmatuly Smaıyl Súıerqululyna alǵysyn aıtyp, rızashylyǵyn bildirdi.
Aıta keteıik, «Islam – yntymaq pen birlik dini» jyly aıasynda uıymdastyrylǵan rýhanı semınar qorytyndysynda qatysýshylarǵa sertıfıkat tabystaldy.
