«Tálimger Paıǵambar taǵylymy» kitabynyń tusaýy kesildi (FOTO)

Jýyrda Qazaqstan musylmandary dinı basqarmasynyń tóraǵasy, Bas múftı Serikbaı qajy Orazdyń bastamasymen «Islam jáne otbasy» jyly aıasynda «Tálimger paıǵambar taǵylymy» atty jańa kitap jaryq kórdi.

Keshe Almatyda ótken QMDB tóralqa májilisinde Bas múftı Serikbaı qajy Satybaldyulynyń qatysýymen jańa kitaptyń tusaýy kesildi.

Tálimi men taǵylymy mol týyndyda eki dúnıeniń sardary, ardaqty paıǵambarymyz Muhammedtiń (oǵan Allanyń salaýaty men sálemi bolsyn) múbárak tulǵasy, ustazdyq qasıeti, úlgi-ónegesi, tárbıe berýde qoldanǵan ádis-tásilderi baıandalǵan. Barsha oqyrman qaýymǵa arnalǵan eńbektiń ustaz ben shákirtke, jalpy jurtymyzǵa berer taǵylymy mol.

«Bul kitap paıǵambarymyzdyń (oǵan Allanyń salaýaty men sálemi bolsyn) ónegeli ómiri men tálimdik tulǵasyna elikteıtin barsha oqyrmanǵa, jamaǵatqa paıdaly bolady degen senimdemin. Atalǵan eńbek Alla Elshisiniń týǵan aıy – qasıetti máýlit aıynda jaryq kórdi. Osy týyndyny shyǵarýǵa, aýdarýǵa úles qosqan barsha azamattarǵa alǵys aıtamyn», – dep atap ótti tusaýkeser rásiminde Bas múftı Serikbaı qajy Oraz.

Aıta keteıik, bul jobanyń jetekshisi – QMDB-nyń Almaty qalasy boıynsha ókil ımamy Erkinbek Kerimbekuly Shohaev, jalpy redaktsııasyn basqarǵan belgili ǵalym, ustaz Baýyrjan Álıuly.Kitap avtory – sheıh Abdýl-Fattah Ábý Ǵýdda ál-Hanafı. Qazaq tiline aýdarǵan – Erjan Orazov.

Sonymen qatar, saltanatty sharada múftııattan shyqqan «Qaıyrymdy jan jánnatqa jaqyn» kitabynyń da tusaýy kesildi. 

​