Táýelsizdiktiń 30 jyldyǵyna arnalǵan halyqaralyq konferentsııa bastaldy (FOTO)
Búgin Nur-Sultan qalasynda Qazaqstan musylmandary dinı basqarmasynyń uıymdastyrýymen el táýelsizdiginiń 30 jyldyq mereıtoıyna arnalǵan «Táýelsiz Qazaqstan jáne Islam qundylyqtary» taqyrybyndaǵy halyqaralyq ǵylymı-tájirıbelik konferentsııa bastaldy.
Konferentsııa Quran oqýmen bastalyp, Táýelsizdik jyldarynda Dinı basqarmanyń atqarǵan qyzmeti jaıly beınerolık kórsetildi. Odan ary Bas múftı Naýryzbaı qajy Taǵanulynyń merekelik quttyqtaýymen ashyldy. QMDB Tóraǵasy konferentsııaǵa qatysyp otyrǵan múftılerge, mártebeli elshilerge, zııaly qaýym ókilderine rızashylyq nıetin jetkizip, táýelsizdiktiń qadiri men beıbitshiliktiń berekesi jaıly baıandama jasady.
Aıta keteıik, jıynǵa Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly, Túrkııa Respýblıkasy Din isteri basqarmasynyń tóraǵasy Alı Erbash, Reseı Federatsııasy musylmandary dinı basqarmasynyń jáne múftıler keńesiniń tóraǵasy Ravıl Gaınýtdın, Ózbekstan musylmandary dinı basqarmasynyń tóraǵasy Nýrıddın Holıknazarov, Qyrǵyzstan musylmandary dinı basqarmasynyń tóraǵasy Zamır Rakıev, Tájikstan Islam ortalyǵy Ǵulamalar keńesiniń tóraǵasy Saıdmýkarram Abdýkodırzoda, Mońǵolııa musylman uıymdary odaǵynyń tóraǵasy Batyrbek Hadys, Reseı Federatsııasy Altaı Respýblıkasy musylmandary dinı basqarmasynyń bas múftıi, Reseı Azııa bóligi musylmandary dinı basqarmasynyń tóraǵasy Janbolat Ohtaýbaev, Reseı Federatsııasy Omby jáne Omby oblysy musylmandary dinı basqarmasynyń tóraǵasy Bota Bakýlın, sonymen qatar memleket jáne qoǵam qaıratkerleri, zııaly qaýym ókilderi, tarıhshy ǵalymdar, sheteldiń elimizdegi ókiletti elshileri, óńirlerdegi bas ımamdar qatysýda.
