«Tolyq adam» kitabynyń tanytymy ótti (FOTO)
El táýelsizdiginiń 30 jyldyq mereıtoıyna oraı Nur-Sultan qalasynda ótip jatqan halyqaralyq konferentsııada Bas múftı Naýryzbaı qajy Taǵanulynyń jetekshiligimen jaryq kórgen «Tolyq adam» ǵylymı-teologııalyq taldaý kitabynyń jáne «Ihsan – osnova dýhovnogo vospıtanııa» kitabynyń tusaýkeser rásimi ótti.
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly, Ózbekstan musylmandary dinı basqarmasynyń tóraǵasy Nýrıddın Holıknazarov, Qyrǵyzstan musylmandary dinı basqarmasynyń tóraǵasy Zamır Rakıev jáne zııaly qaýym ókilderi kitaptyń tusaýkeser rásimine qatysty.
Naýryzbaı qajy Taǵanuly «Tolyq adam» kitabynda sonaý ańyz-áfsanadan bastap, asyl dinimiz Islamdaǵy, sondaı-aq uly daladan shyqqan oıshyldarymyzdyń eńbekterindegi oı-tujyrymdarǵa qysqasha túsiniktemeler berilip, taldaýlar jasalǵanyn atap ótti.
«Qolyńyzdaǵy kitapta adam týraly sonaý ańyz-áfsanadan bastap, asyl dinimiz Islamdaǵy, sondaı-aq uly dalamyzdan shyqqan oıshyldardyń eńbekterinde kelgen oı-tujyrymdarǵa qysqasha túsiniktemeler berilip, ǵylymı teologııalyq taldaý jasaý arqyly, joǵary adamgershilik qasıetterge ıe «ıdeal adam» máselesi talqyǵa túsedi. Kópshilikke úlgi-ónege bolarlyq mundaı adamǵa ortaǵasyrlyq ǵalymdarymyz «ál-ınsan ál-kámıl» degen ataý bergen. «Ál-kámıl» sózi arab tilinen aýdarǵanda tutas, tolyq, bútin, aıaqtalǵan degen maǵynaǵa saıady. Demek «ál-ınsan ál-kámıl» degendi qazaq tilinde «tolyq adam», «kemel adam» nemese «jetilgen adam» dep aıtýǵa bolady.
Ál-Kındı, ál-Farabı, Ibn Sına, Ibn Rýshd, Rýmı, Ibn Arabı, Ǵazalı, Balasaǵunı, Iasaýı jáne t.b. ortaǵasyrlyq musylman ǵalymdar «ál-ınsan ál-kámıldi» óz shyǵarmalarynda ár qyrynan taldap qarastyrsa, hakim Abaı shyǵarmalarynda bul termın qazaqılanyp «Tolyq adam» ataýymen arnaıy ilim retinde usynyldy. Bul zańdy qubylys. Sebebi Abaı jastaıynan ortaǵasyrlyq kemeńgerlerdiń týyndylarynan sýsyndady, ásirese, J.Balasaǵunı men A.Iassaýıdiń shyǵarmalarynyń tıgizgen áseri mol ekenin eskersek, Abaı atamyz usynǵan «Tolyq adam» iliminiń qaıdan bastaý alǵandyǵyn ańǵarýǵa bolady» dedi Bas múftı.
«Mýftııat baspasy» shyǵarǵan atalmysh kitap «Adam jaratylysy men bolmysy: Jan men tán», «Uly dalanyń kemeńger tulǵalary eńbekterindegi «Tolyq adam» máselesi» jáne «HHI ǵasyrdaǵy «Tolyq adam» jáne jastar» atty úsh bólimnen turady. Eńbekti daıyndap, baspaǵa ázirlegen – PhD doktory Yqtııar Paltóre men fılosofııa ǵylymdarynyń kandıdaty, dotsent Jalǵas Sandybaev. Jınaq ıslamtanýshylarǵa, teologtarǵa, dinı bilim alyp jatqan stýdentter men magıstrlerge, sondaı-aq kópshilik oqyrmanǵa arnalǵan.
