TÓRALQA MÁJILISINDE BES BAǴYT ESEBI TYŃDALDY (FOTO)
Qazaqstan musylmandary dinı basqarmasynyń 2023 jyldy qorytyndylaýǵa arnalǵan Tóralqa májilisiniń ekinshi kúni basshylyq quram men bólim meńgerýshileri baıandama jasady.
Bas múftı Naýryzbaı qajy Taǵanulynyń tóraǵalyǵymen ótken májiliste «Islam jáne izgi qoǵam» jyly aıasynda atqarylǵan aýqymdy jumystar jóninde arnaıy beınerolık nazarǵa usynyldy. Jıynǵa qatysqan Din isteri komıteti tóraǵasynyń orynbasary Baýyrjan Bákirov Dinı basqarma ujymy men ımamdarǵa alǵys bildirip, áriptestik baılanys jalǵasa beretinin jetkizdi. Sondaı-aq QMDB Tóraǵasy Naýryzbaı qajy Taǵanuly:
«Allaǵa shúkir, keshe ımamdarymyz jyl boıy jasaǵan jumys esepterin tıisti deńgeıde baıandap ótti. Búgin jyl basynda ózderińizge joldaǵan Baǵdarlyq baıandamamda berilgen tapsyrmalardyń oryndalý barysy, Aıtýly is-sharalardyń, bes baǵyt boıynsha atqarylǵan jumystardyń esebin tyńdaımyz» dep basshylyq quram men bes baǵytqa jaýapty bólim meńgerýshileriniń baıandamasyna kezek berdi. Atap aıtqanda, Baǵdarlyq baıandama boıynsha atqarylǵan jumys esebin naıb múftı Ershat Aǵybaıuly, al aıtýly is-sharalar boıynsha atqarylǵan jumys esebin Apparat basshysy Ǵylymbek Jádigeruly baıandap ótti. Al Bas múftı keńesshisi Kenjetaı Baıkemeluly 2023 jylǵa josparlanǵan din qyzmetkerlerin attestattaý jumysy oıdaǵydaı aıaqtalǵanyn aıtty.
Bólim meńgerýshileri Nurbek Áýeshanuly, Smaıyl Súıerqululy, Batyrjan Berdenuly, Hasan Amanqul men Jándillá Mamythanuly múftııat bekitken bes baǵyt boıynsha jyldyq jumys esebin baıandady.
Májiliske qatysýshy bólim meńgerýshileri men oblystyq ókildikterdiń bas ımamdary usynys-pikirlerin ortaǵa saldy. Bas múftı Naýryzbaı qajy Taǵanuly barsha din qyzmetkerlerine alǵysyn bildirip, múftııat jumysyn áli de jetildire berý qajettigin, aldaǵy jyly budan da joǵary deńgeıde eleýli isterdi atqarý kerektigin eske saldy.
