TÓRALQA MÁJILISINDE «MUFTIYAT» BASPASYNYŃ JAŃA KITAPTARY TANYSTYRYLDY (FOTO)
Búgin Qazaqstan musylmandary dinı basqarmasynyń Tóralqa májilisinde rýhanı-aǵartýshylyq baǵyttaǵy birqatar jańa kitaptardyń tusaýkeser rásimi ótti.
Atalǵan jıynda Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly «Juma ýaǵyzy», «Otbasy suraq-jaýaptary» jáne «Rýhanı mura» serııasy aıasynda jaryq kórgen kitaptardyń tusaýyn kesti.
«Juma ýaǵyzy» jınaǵyna respýblıka boıynsha meshitterde juma namazy kezinde oqylatyn ýaǵyz taqyryptary engizilgen. Kitaptaǵy materıaldar qasıetti Quran aıattary, Paıǵambarymyzdyń (oǵan Allanyń salaýaty men sálemi bolsyn) hadısteri, din ǵalymdarynyń taǵylymdy ósıetteri men qazaq halqynyń rýhanı murasyndaǵy ónegeli oı-tujyrymdarǵa negizdelgen. Eńbek jurtshylyqqa túsinikti, jeńil tilmen jazylǵan.
«Otbasy suraq-jaýaptary» kitabynda nekege qatysty úkimder, erli-zaıyptylardyń quqyqtary men mindetteri, ajyrasý máseleleri jáne otbasylyq ómirge baılanysty ózge de ózekti taqyryptar Hanafı mázhaby men zamanaýı ǵalymdardyń pátýalary negizinde suraq-jaýap formatynda baıandalǵan. Bul eńbek jalpy oqyrman qaýymǵa arnalǵan.
Al «Rýhanı mura» serııasy QMDB janyndaǵy Islam ǵylymı-zertteý ınstıtýtynyń bastamasymen júzege asyrylyp otyrǵan joba bolyp tabylady. Atalǵan joba aıasynda «Múftııat» baspasynan jaryq kórgen kitaptarda qazaq dalasynda keń taraǵan dinı-tanymdyq ári ǵıbrattyq eńbekter toptastyrylǵan. Atap aıtqanda, Qashshafýddın ıbn Shanmardannyń «Oqy namaz, dostarym», Máshhúr Júsip Kópeıulynyń «Din taǵylymy», Ibrahım Tileýqabylulynyń dinı-dıdaktıkalyq shyǵarmalary engizilgen. Bul eńbekter dástúrli dinı tanymdy dáriptep, ulttyq rýhanı qundylyqtardy jańǵyrtýǵa baǵyttalǵan.
Tóralqa májilisinde Bas múftı jaryq kórgen kitaptar el ishindegi dinı saýattylyqty arttyrýǵa, qoǵamǵa paıdaly dinı bilim berýge jáne ulttyq rýhanııatty nasıhattaýǵa qyzmet etetinin atap ótti.
