TÚRKI MEMLEKETTERI MÚFTILERINIŃ ALQALY MÁJILISI ÓTTI (FOTO)
Búgin elordada Álemdik jáne dástúrli din lıderleriniń VII sezi aıasynda túrki memleketteri múftıleriniń alqaly májilisi ótti.
Basqosýǵa Túrki memleketteri uıymynyń Bas hatshysy Baǵdat Ámireev, Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly, Kavkaz musylmandary basqarmasynyń tóraǵasy, sheıh Allashúkir Pashazade, Qyrǵyzstan musylmandary dinı basqarmasynyń tóraǵasy, Bas múftı Zamır Rakıev, Túrkmenstannyń Bas múftıi Ialkap Hodjagýlyev, Ózbekstan musylmandary basqarmasynyń birinshi orynbasary Hamıtjan Ishmatbekov qatysty.
«Ózderińizge málim, biz kıeli Túrkistan qalasynda túrkitildes memleketteriniń «Múftıler alqasyn» ótkizdik. Oǵan ózderińiz qatysyp, belsendilik tanyttyńyzdar. Allaǵa shúkir, qazir túrki memleketteriniń arasyndaǵy Ekonomıkalyq, áleýmettik, áriptestik baǵytyndaǵy baılanystar nyǵaıyp keledi. Endigi kezekte rýhanı baılanysty arttyrý asa mańyzdy baǵyttyń biri bolyp otyr. Búgingi tarıhı basqosýdyń ózi bizdiń aramyzdaǵy baýyrmaldyq baılanystyń artýyna úlken serpin beredi dep senemin» dedi Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly.
Májiliste Bas múftıler Álemdik jáne dástúrli dinder lıderleri seziniń dinaralyq dostyqty arttyrýdaǵy róli, túrki memleketteriniń rýhanı birligin, dinı senimin, salt dástúrin jáne ortaq muralaryn dáripteý máselesi talqylandy. Sonymen qatar Ahmet Iasaýı babamyzdyń Qorqyt ata, Máýlana, Naýaı, Manas muralaryn nasıhattaý, Matýrıdı senim mektebi men Ábý Hanıfa mázhabyn halyqqa dáripteý, dinı oqý-aǵartý salalaryn damytý máselesi sóz boldy.
Jıynda Qazaqstan musylmandary dinı basqarmasy usynǵan túrki memleketteri «Múftıler alqasy» qujatynyń jobasy pysyqtaldy.
