TÚRKI JURTYNYŃ MÚFTILERI 100 QURAN HATYM DUǴASYNA QATYSTY (FOTO)
Búgin Túrkistan qalasynda túrki memleketteriniń múftıleri, atap aıtqanda, Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly, Túrkııa Respýblıkasy Din isteri basqarmasynyń basshysy, Bas múftı Álı Erbash, Kavkaz musylmandary basqarmasynyń tóraǵasy, Bas múftı Allashúkir Pasha-Zade, Ózbekstan musylmandary basqarmasy tóraǵasynyń birinshi orynbasary Hamıtjan Ishmatbekov, QMDB Ǵulamalar keńesiniń, Aqsaqaldar keńesiniń músheleri, ǵalymdar men oblys bas ımamdary Qoja Ahmet Iasaýı kesenesinde «Babalar rýhyna 100 Quran hatym» rásimine qatysty.
Igi is-sharada Bas múftı Naýryzbaı qajy Taǵanuly: «Qurmetti shetelden kelgen mártebeli múftıler! Qasıetti Túrkistan qalasyna qosh keldińizder! Alla Taǵala Qoja Ahmet Iasaýı kesenesine jasaǵan zııarattaryńyzdy, babamyzdyń rýhyna baǵyshtaǵan Quran hatym duǵalarymyzdy qabyl etkeı. Rasynda, Quran oqylǵan, oǵan amal etilgen úıde, jerde, elde tynyshtyq ornaıdy, Allanyń bereketi bolady. Budan túıetin oı – Quransyz ómirdiń máni de, sáni de joq. Biz, ómirden ótken jandarǵa Quran baǵyshtap, Qudaıdan jarylqaý tilegen túrki-musylman halyqtarynyń búgingi urpaǵymyz. Bizdiń ımamdarymyz ben medrese shákirtterimiz búgingi tarıhı oqıǵa qarsańynda ata-baba rýhyna arnap qasıetti kitabymyz Qurandy 100 ret hatym etti. Alla Taǵala oqyǵan Quranymyz ben jasaǵan duǵamyzdy qabyl etkeı. Ámın!» dedi.
Izgi is-sharada din qaıratkerleri Qoja Ahmet Iasaýı qabirin zııarat etip, baba rýhyna qasıetti Quran aıattaryn baǵyshtady.
