Túrkistanda aımaqtyq dinı semınar ótti (FOTO)

Búgin QMDB tóraǵasynyń birinshi orynbasary, naıb múftı Naýryzbaı qajy Taǵanulynyń bastamasymen QMDB-nyń Túrkistan qalasyndaǵy keńsesinde «Er Túriktiń besigi – rýhanı jańǵyrǵan Túrkistan» atty aımaqtyq dinı semınar ótti. QMDB-nyń Túrkistan qalasyndaǵy keńsesi tarapynan alǵash uıymdastyrylǵan semınardy QMDB tóraǵasynyń birinshi orynbasary, naıb múftı Naýryzbaı Taǵanuly ashyp, júrgizip otyrdy.

Semınarǵa Túrkistan oblysy ákiminiń orynbasary Ulasbek Sádibekov, Túrkistan qalasynyń ákimi Álipbek Óserbaev, QMDB-nyń Nasıhat jáne qoǵammen baılanys bóliminiń meńgerýshisi Atynbek Utyshanuly, QMDB-nyń Meshit isteri bóliminiń meńgerýshisi Jándillá Bekjigitov, dintanýshy-ǵalym, professor Dosaı Kenjetaı, Jambyl oblysy boıynsha ókil ımamy Danııar Álımuhammeduly Jumabaev, Qyzylorda  oblysy boıynsha ókil ımamy Bolatbek Ulasqanuly Abýov jáne Din isteri basqarmalary men din máselelerin zertteý ortalyqtarynyń basshylary, respýblıkaǵa belgili dintanýshy-teologtar, «Shymkent», «Saryaǵash» medrese-kolledjderiniń basshylary, oblystaǵy meshitterdiń ımamdary, buqaralyq aqparat quraldarynyń ókilderi qatysyp, sóz sóıledi.

Elimizdegi dinı turaqtylyqty qamtamasyz etý, memlekettiń zaıyrly qaǵıdalaryn nyǵaıtý, destrýktıvti dinı uıymdardyń aldyn alý maqsatynda oblystyq  jergilikti aqparattyq-nasıhat toptary (JANT) músheleriniń biliktiligin kóterý, dinı Ekstremızmdi nasıhattaýdyń aldyn alý, ásirese ınternet pen áleýmettik jelide saqtaný sharalaryn jetildirý, qoǵamda kereǵar aǵymdarǵa qarsy turatyn biryńǵaı ımmýnıtet qalyptastyrý - semınardyń basty maqsaty boldy.

Semınar barysynda arnaıy baıandamalar tyńdalyp, qatysýshylar alda atqarylatyn jumystaryn aıqyndap aldy.