Túrkistanda «Tóle bı» fılminiń tanystyrylymy ótti
Túrkistan oblysynyń qurylǵanyna 1 jyl tolýyna oraı Qoja Ahmet Iasaýı atyndaǵy halyqaralyq qazaq-túrik Ýnıversıtetinde «Tóle bı» fılminiń tanystyrylymy uıymdastyryldy.
Fılmde Tóle bıdiń balalyq shaǵynan bastap ısi qazaqqa Tóle bı atanǵan qart kezine deıingi ómiri tolyq qamtylǵan. Sondaı-aq danagóı bıdiń Táýke han, Qazybek bı, Áıteke bı, Bógenbaı, Qabanbaı batyrlarlar sekildi zamandastarymen birge eldik máselelerdi sheshken sátteri baıandalady. Telehıkaıa 10 serııadan turady. Ár serııasy – 30 mınýttan.
Fılmniń tanystyrylymynda Túrkistan oblystyq mádenıet basqarmasynyń basshysy Isabek Nurdaýlet quttyqtaý sóz sóılep, osy týyndyny jaryqqa shyǵarǵan azamattarǵa alǵysyn aıtty.
Telehıkaıanyń rejısseri – Batyrhan Dáýrenbekov, kórkemdik jetekshisi – Satybaldy Narymbetov, stsenarıı avtory – Baqytjan Quljabaı, Shoıbek Orynbaı, qoıýshy operator – Fýrkat Saıpov, kompozıtor – Rýslan Shynyqulov. Basty rólderde – Abzal Tólen jáne Saǵyndyq Jumadilov.
Fılmniń qysqartylǵan nusqasy túrkistandyqtardyń nazaryna usynylǵan soń týyndynyń kórkemdik jetekshisi, asa kórnekti rejısser Satybaldy Narymbetov osy fılmge qatysqanyn maqtan tutatynyn jetkizse, Tóle bı týraly kitaptyń avtory, jazýshy Shoıbek Orynbaı óz romanynyń Ekranǵa sátti shyqqanyna qýanyshty ekenin, senimi aqtalǵanyn aıtty.
Al, fılm rejısseri Batyrhan Dáýrenbekov «Serıal arqyly Tóle bı babamyzdyń tek sheshen ǵana emes, jas kezinde el úshin qolyna naıza alǵan batyr bolǵanyn, keıin úlken saıasatkerge aınalǵanyn, «Jeti jarǵy» zańdar jınaǵyn shyǵarýǵa atsalysqan tulǵa ekenin kórsete bildik. Qoldaý bildirgen Túrkistan oblysy ákimdigine rahmet. Biz endi tarıhı fılm túsirýden qoryqpaımyz», – dedi.
Saltanatty jıyn sońynda fılmge atsalysqan azamattarǵa alǵyshattar tapsyryldy.
