TÚRKIIaDA BRAIL JÚIESIMEN QURAN OQÝ JÓNINDE SEMINAR ÓTTI
Qazaqstan musylmandary dinı basqarmasynyń Túrkııa Respýblıkasyndaǵy ókildigi, «Talaba» qaýymdastyǵy men «Halyqaralyq zaǵıptarǵa arnalǵan Quran kyzmeti qaýymdastyǵy» birlesip Ystambul qalasynda «Kórý qabileti shekteýli jandarǵa arnalǵan dinı qyzmetterdi damytýda qoǵamdyq uıymdardyń yntymaqtastyǵy men róli» taqyrybynda eki kúndik semınar ótkizdi.
Kórý qabileti tómen jandarǵa arnalǵan ońaltý ortalyǵynda ótken semınarǵa Bas múftı tapsyrmasymen QMDB «Zeket jáne qaıyrymdylyq» qorynyń dırektory Maqsatbek Qaıyrǵalıev, «MUFTIYAT» baspasynyń dırektory Murat Manapuly, «Ýaqyp» qorynyń dırektory Ardaq Orazbaı, sondaı-aq, «Talaba» qaýymdastyǵynyń jetekshisi Jandos Aıtbaı, Túrkııa Bilim mınıstrliginiń, Otbasy jáne áleýmettik máseleler mınıstrligi, Ystambul qalasynyń ákimshilik ókilderi, qazaqstandyq ımamdar men osy elde bilim alyp jatqan doktoranttar qatysty.
«Halyqaralyk zaǵıptarǵa arnalǵan Quran kyzmeti qaýymdastyǵy» dırektory Halıs Quralaı delegattarǵa qaýymdastyq atqaryp jatqan jumystardy tanystyryp ótti. Zaǵıp jandarǵa Braıl júıesimen ázirlengen Quran Kárim kitaptaryn shyǵarýmen jáne olardy taratýmen aınalysatyn qaýymdastyq basshysy kózi nashar kóretin jáne múldem kórmeıtin jandarǵa birlese qyzmet etýge shaqyrdy. Óz kezeginde «Zeket jáne qaıyrymdylyq» qorynyń dırektory Maqsatbek Maqsotuly:
«Kórý qabileti tómen jandarǵa arnaıy qoldaý jobasy aıasynda «shoýdaýn» ústelderin jasaýdy qolǵa aldyq. Dál sondaı zaǵıp bolsa da, talantty balalardy halyqaralyq mýzykalyq baıqaýlarǵa jiberý, Braıl júıesimen Quran oqytý jobasyn qolǵa alyp jatyrmyz. Olardy qoldaý maqsatynda arnaıy oqý quralyn daıyndadyq. Endigi mejemiz – Braıl júıesimimen Quran jáne basqa kitaptardy basyp shyǵarý» dedi.
Aıta keteıik, eki kúnge jalǵasqan semınar sońynda qatysýshy-delegattarǵa arnaıy sertıfıkat tabystaldy.
