«Ýaqyp» qory Qazaqstan musylmandary dinı basqarmasyna avtokólik syılady (FOTO)

Búgin «Ýaqyp» korporatıvtik qaıyrymdylyq qory Qazaqstan musylmandary dinı basqarmasy qyzmetkerleriniń ıgiligi úshin  temir tulpar tartý etti. Qor prezıdenti Qaırat Orynbaıuly bastaǵan top respýblıkalyq «Áziret Sultan» meshitine arnaıy kelip, avtokólik kiltin saltanatty túrde QMDB tóraǵasynyń birinshi orynbasary, naıb múftı, «Áziret Sultan» meshitiniń bas ımamy Naýryzbaı qajy Taǵanulyna tabystady. Qor atynan jasalǵan qaıyrymdylyq sharasyna oraı Naýryzbaı qajy Taǵanuly rızashylyǵyn jetkizip, QMDB atynan alǵys bildirdi.

Aıta keteıik, «Jas» markaly temir tulpar Qostanaı mashına qurastyrý zaýytynan shyqqan otandyq ónim bolyp esepteledi. Qasıetti Ramazan aıynda jasalyp otyrǵan  bul ıgi jaqsylyq demeýshi kásipkerlerdiń qoldaýymen júzege asyp otyr.

Qaırat Orynbaıuly, «Ýaqyp» korporatıvtik qaıyrymdylyq qorynyń prezıdenti:

«Avto» mekemesiniń ókilderi Ramazan aıynda bizdiń «Ýaqyp» qaıyrymdylyq qoryna kólik syılap, ony osy ıman jolynda júrgen ımamdarǵa, dinı basqarmaǵa qaıyrymdylyq retinde berip otyr.

Bizdiń qordyń jumys istep jatqanyna qazir 1 jyldyń kólemi boldy. Óte kóp kásipkerler bizge ózidiginen kelip, qol ushyn berýge nıettenip otyr. Odan túsip jatqan qarajattardyń kólemi qomaqty bolǵandyqtan sonyń arqasynda búgingi kúni 355 ımamǵa materıaldyq kómek kórsetip otyrmyz. Ekinshi jaǵynan 170-teı ımamdy biliktiligin kóterý ınstıtýtyna jiberip otyrmyz. Munyń bári Elbasynyń rýhanı jańǵyrý joldaýy aıasynda júrip jatqan sharalar».