Umra rásimin jasaýǵa jol ashyldy
2021 jyldyń tamyz aıynan bastap álemde juqpaly indettiń qaýpi seıilip, kúlli musylman qaýymy saǵyna kútken qasıetti meken – Mekke men Mádınaǵa bara bastady.
Saýd Arabııa Koroldigi qajylyq jáne umra qulshylyǵyn jasaý maqsatynda keletin shetel azamattaryna SAK Densaýlyq saqtaý mınıstrligi resmı bekitken (Pfizer-BioNTech, AstraZeneca, Johnson&Johnson jáne Moderna) vaktsınalarynyń biri egilýin basty talap etip qoıdy. Óz kezeginde Qazaqstan musylmandary dinı basqarmasy elimizdegi musylman jamaǵatyna pandemııa kezinde kishi qajylyq jasaýǵa asyqpaýǵa, jaǵdaı turaqtalyp, SAK resmı bekitken vaktsınalardyń biri elimizge kelgennen keıin ǵana jolǵa qamdanýǵa keńes bergen bolatyn.
QR Densaýlyq saqtaý mınıstrligi men Pfizer kompanııasy arasyndaǵy kelisimge saı, atalmysh vaktsına elimizge jetkizilip, qazaqstandyqtarǵa salyna bastady. Ekpeniń elimizge kelýi musylman jamaǵatyn qýantyp otyr. Densaýlyq saqtaý mınıstriniń málimdemesinde Pfizer vaktsınasyn shetelge saparǵa shyǵatyn azamattar aqyly túrde saldyrýyna bolatyny habarlandy. Sonymen qatar jýyq arada vaktsınanyń baǵasy men ony salatyn oryndar sheshilip, Pfizer vaktsınasynyń tapshylyǵy týyndamaıtyny aıtylǵan.
Endi dárigerlerdiń keńesimen Pfizer vaktsınasyn qabyldaǵan kez-kelgen azamat, senimdi dep tabylǵan qajylyq kompanııalarynyń birimen zańdy jolmen umra qajylyǵyn atqaryp qaıtýyna bolady.
Qazirgi ýaqytta kishi qajylyq óteýge nıet etken jandardyń qatary kóbeıýde. Mekke men Mádına qalasyndaǵy meshitterde kúnine birneshe ret zalalsyzdandyrý jumystary júrgizilip, qajylardyń qaýipsizdigi basty nazarǵa alynýda.
Álemdik indet saldarynan qajylyq rásiminiń ýaqytsha toqtatylǵany belgili. Mıllıondaǵan musylman indetten tezirek qutylyp, qajylyq pen umra rásimderin erkin atqaratyn kúnge jetýdi Alladan jalbaryna surady. Osy oraıda Qazaqstan musylmandary dinı basqarmasy umra jáne qajylyq paryzyn óteýge nıet bildirgen azamattarǵa tómendegi eskertýlerdi qaperge salady:
Birinshiden, Saýd Arabııasynyń el jáne shetel azamattaryn indetten saqtandyrý maqsatynda bekitilgen ekpeniń birin saldyrý talabyn oryndaý mańyzdy. Óıtkeni bul talap aldymen azamattardyń óz densaýlyǵy úshin qajet. Densaýlyq – Allanyń pendege bergen eń úlken nyǵmeti. Alla Taǵala Quran Kárimde: «Olar saqtyq sharalaryn qamtamasyz etip, qarýlansyn» («Nısa» súresi, 102-aıat) degen. Ardaqty Paıǵambarymyz (oǵan Allanyń salaýaty men sálemi bolsyn): «Denniń saýlyǵy – eń úlken nyǵmet» degen. Demek ár adam Allanyń bergen baılyǵy – densaýlyǵyna jiti mán berip, ózin qorǵaýy qajet. Qajylyqqa ruqsat berilgenmen, túrli jolmen, túrli ádispen ekpe qujatyn jasatýǵa ruqsat berilmeıdi. Mundaı is eń áýeli adamnyń óz densaýlyǵyna qaýipti. Osy rette túrli aıla-áreketpen qajylyqqa qatysty qujat rásimdemeý qajettigin basa aıtyp ketkimiz keledi. Qajylyq pen umrany óteý – kez kelgen musylmanǵa násip bola bermeıtin ǵıbadat túri. Násip bolǵan kisi – Alla Taǵalanyń qurmetti qonaǵy. Sol sebepti ony óteý joly da tazalyq pen týralyqqa negizdelýi tıis.
Ekinshiden, umra óteý talaptar oryndalmaǵan nemese ekpeniń jalǵan qujatymen ustalǵan jaǵdaıda sheteldik azamattar úshin aıyppuldar belgilengenin jetkizemiz. «Arab News» gazetinde jaryq kórgen maqalada: «Saýd Arabııasy umra rásimderiniń talaptaryn buzǵan qajylarǵa 10 myń rıal (2667 AQSh dollary) kóleminde aıyppul salynatyyn málim etedi» dep jazylǵan. Sondyqtan umra rásimderin atqarý kezinde belgilengen talaptardy túsinistikpen qabyldap, qulshylyq oryndaý barysynda yjdahattylyq tanytýǵa shaqyramyz.
Adamzat balasynyń indetten tezirek qutylyp, qajylyq pen umra rásimderin emin-erkin atqaratyn kúnge jetýdi Alla bizge násip etsin! Ámın!
