V RESPÝBLIKALYQ IMAMDAR FORÝMYNYŃ QUJATTARY TANYSTYRYLDY (FOTO)

QMDB Astana ókildigi qyzmetkerleriniń qatysýymen «Áziret Sultan» meshitinde V Respýblıkalyq ımamdar forýmy qujattaryn talqylaý jıyny ótti. Jaqynda ǵana ótken «Imam – izgi qoǵam jarshysy» atty forýmda qabyldanǵan «Qazaqstan musylmandary dinı basqarmasynyń rýhanı (dinı jáne ulttyq) qundylyqtardy nasıhattaýdaǵy róli», «Imamnyń jamaǵat namazyn ótkizý tártibi», «Qajynyń rýhanı kelbeti» qujattary jıynda ókildik qyzmetkerlerine keńinen tanystyrylyp, osy baǵyt boıynsha atqarylatyn jumys jospary bekitildi.

Qasıetti Quran aıattarymen ashylǵan jıyn barysynda Astana qalasynyń bas ımamy Erbolat Júsipov atalmysh qujattardyń mańyzdylyǵyna atap ótip, dinı rásimderdi osy qujattarǵa saı atqarý týrasyndaǵy josparymen bólisti. Sondaı-aq, Erbolat Nuryldauly Astana ókildigi boıynsha 2022 jyly atqarylǵan is-sharalar esebine toqtalyp, jetken jetistikter men ketken kemshilikter jaıynda da aıtyp ótti. Sóz sońynda barsha ókildik qyzmetkerlerin bir úıdiń balasyndaı jumyla jumys isteýge shaqyrdy.

Dinı jáne ulttyq qundylyqtardy dáripteýde, dinı qulshylyqtardy sharıǵat talabyna saı atqarý isinde, dinı rásimderdi birizdilikpen ótkizýde din qyzmetkerleriniń róli men jaýapkershiligi asa zor. Sondyqtan alqaly jıynda Jumanazar Óserhanuly men Ashat Salımov, Dastan Smaǵulov úsh qujat boıynsha arnaıy baıandama jasap ótti.