VI respýblıkalyq ákeler forýmy ótti (FOTO)
Shymkent qalasy ákimdigi jáne «Ákeler Odaǵy» RQB uıymdastyrýymen «Ákege qarap ul óser» taqyrybynda VI Respýblıkalyq Ákeler forýmy ótti.
Mańyzdy jıynǵa QMDB Tóraǵasynyń orynbasary, naıb múftı Ershat Ońǵar qatysyp, arnaıy baıandama jasady.
«Ardaqty Muhammed paıǵambarymyz (oǵan Allanyń salaýaty men sálemi bolsyn): «Er kisi –otbasynyń baqtashysy, sondyqtan ol qol astyndaǵylarǵa jaýapty» degen. Qazaq halqynda «Ákege qarap ul óser, sheshege qarap qyz óser» jáne «Jaqsy áke balaǵa qyryq jyl azyq» degen qanatty sózder bar. Ár otbasyda balalary «meniń ákem», «meniń anam» dep ata-analaryn úlgi tutyp, maqtanysh etse, áke men ana da «mine, meniń balam» dep otyrsa, ol otbasy maqtanyshy bolyp esepteledi. «Otbasy shaǵyn memleket» demekshi, Alla Taǵala barshamyzdyń otbasymyzǵa baıandy baqyt pen amandyq bergeı!» dedi Ershat Aǵybaıuly.
Aıta keteıik, Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń jáne BUU-nyń Qazaqstandaǵy halyq qonystanýy salasyndaǵy qorynyń (IýNFPA) qoldaýymen ótken forýmda «Otbasy jáne din», «Otbasylyq tárbıede ákeniń rólin arttyrý», «Qazaqstanda otbasy ınstıtýtyn qalyptastyrýǵa BAQ pen blogerlerdiń áseri», «Balalarǵa sporttyq tárbıe berý», «Mektepterde ákeler keńesin damytý», «Erekshe balalardyń erekshe ákeleri», «Balalardy tárbıeleýdegi kitaptyń róli» taqyryptarynda belsendi pikirtalastar ótti.
Forým óskeleń urpaqty tárbıeleýdiń ózekti máselelerin sheshý boıynsha ortalyq jáne jergilikti atqarýshy organdarǵa arnalǵan naqty usynystardy atap ótýmen aıaqtaldy.
Is-shara sońynda óńirlerden kelgen delegattarǵa jeke úlgi retinde jáne áke ınstıtýtyn damytýǵa qosqan úlesi úshin ulttyq komıssııanyń atynan alǵys hattar tabys etildi.
