«Yryskeldi qajy» meshitinde Quran jarysy ótti (FOTO)

Qasıetti Ramazan aıy qarsańynda Elordamyzdaǵy «Yryskeldi qajy» meshitinde Quran jarysy bolyp ótti. Meshittegi dinı saýat ashý kýrsynyń baǵdarlamasyn támamdap, búginde Quran súrelerin ózdigimen oqı alatyndaı dárejege jetken shákirtter arasyndaǵy Quran jarysy olardyń osy kezge deıin alǵan bilimderin sarapqa salyp, nátıjesin tanytqan úlken synaq boldy. Jarystyń saltanatty ashylý rásiminde  «Yryskeldi qajy» meshitiniń bas ımamy Iahııa qajy Abdollauly, respýblıkalyq «Áziret Sultan» meshitiniń naıb ımamy Baqytjan Ótkelbaevtar izgi tilekterin bildirip, qatysýshylarǵa sáttilik tiledi.

15-ke jýyq úmitker qatysqan Quran jarysyna respýblıkalyq «Áziret Sultan» meshitiniń naıb ımamy Baqytjan Ótkelbaev, «Astana» medresesiniń ustazy Álı Abdýsamıǵ Álı, «Yryskeldi qajy» meshitiniń naıb ımamy Rashıd Alpysbaevtar tórelik jasap, júzden júırigin anyqtaýǵa tyrysty.

Ádilqazylar suraqtarynan múdirmeı ótip, jattaý qabileti men qyraǵaty boıynsha qapysyz daıyndyq tanytqan qatysýshylarǵa júldeli oryndar berilip, arnaıy «Alǵys hat» pen baǵaly syılyqtar tabys etildi. Atap aıtsaq, Absadyq Saǵıdolla men Muratov Bekzatqa «yntalandyrý» syılyǵy berilip, 10 000 teńgelik sertıfıkat tabystaldy. Al, júlde qory 20 000 teńge bolatyn III-orynǵa Ordabekov Azız ıe bolsa, II-oryn júldegeri Janaıdarov Ádilge 30 000 teńgeniń sertıfıkaty buıyrdy. Quran jarysynyń bas júldesi (júlde qory 50 000 teńge) Turǵalı Dastanǵa berildi.

Saıys sońynda qatysýshylar men qonaqtarǵa, meshit jamaǵatyna arnaıy dastarhan jaıylyp, Quran jarysynyń jalǵasy berekeli otyryspen aıaqtaldy.