ZAǴIP QARTTARǴA QURBAN AIT SYILYǴY BERILDI (FOTO)

Búgin Astana qalasyndaǵy «Áziret Sultan» meshitinde múmkindigi shekteýli 30 kisige azyq-túlik qorjyny berildi.

Elorda tórindegi «Áziret Sultan» meshitinde Qurban aıt qarsańynda múmkindigi shekteýli qarttardyń bos ýaqytyn tıimdi ótkizýge arnalǵan «Shuǵyla» qoǵamdyq birlestiginiń múshelerine qaıyrymdylyq jasalyp, azyq-túlik qorjyny úlestirildi. QMDB zeket jáne qaıyrymdylyq qorynyń Astana ókildigi boıynsha jaýapty mamany Jaqııa Mereı Qanatuly zaǵıp qarttardy Qurban aıt meıramymen quttyqtap, ómirlerine bereke tiledi.

Ardaqty arafa kúninde jasalǵan ıgi shara barysynda «Shuǵyla» qoǵamdyq birlestiginiń tóraıymy Bahytjamal Karıbaeva ulyq meıramda adamgershilikten tys qalmaı qarııalarǵa kórsetken qamqorlyq úshin Mereı Qanatuly men meshit ujymyna óz rızashylyqtaryn bildirdi.

Aıta keteıik, janarlary jaryq dúnıeni kórmese de, jigeri muqalmaı, kóńilderine sáýle túsirýge umtylyp júrgen qarııalardyń ıgiligi úshin qurylǵan «Shuǵyla» birlestiginiń tóraıymy Bahytjamal Karıbaeva braıl júıesimen Quran úıretip, shákirt tárbıeleıdi. Osy eńbegi úshin bas múftı Naýryzbaı qajy Taǵanulynyń marapatyna da ıe bolǵan.