«Zeıin» oqyrmandar klýby jas ǵalymmen suhbattasty (FOTO)
«Zeıin» oqyrmandar klýbynyń kezekti basqosýynda jas ǵalym, jazýshy-alashtanýshy Eldos Toqtarbaı qonaq bolyp, «Abaı men Shákárimniń qazaǵy qandaı edi?» degen taqyrypta áńgime órbitti.
Jas qalamger elordalyq kitapsúıer jastarmen júzdesýde Abaı, Shákárim shyǵarmalaryndaǵy minez, bolmys jóninde aıta kelip, oqyrmandar saýalyna jaýap berdi.
«Abaı men Shákárim, Alash zııalylary syndy ǵulama atalarymyzdyń murasyn zerttep júrgen jazýshy-ǵalym retinde «Abaı men Shákárimniń qazaǵy qandaı edi?!» degen saýal únemi oılandyratyn-dy. Eki ǵulamanyń shyǵarmashylyǵyndaǵy qazaq beınesi – izgilikke qumar, kemel musylman sıpaty. Ol – izdengish, jańashyldyqqa tez beıimdeletin, amaly túgel, ońy men solyn aıyrǵan minezi kórkem qazaq balasy. Bir sózben aıtqanda, Abaı da, Shákárim de – qazaq úshin minez synshysy bolatyn. Qazaqtyń tarıhynda Abaı sııaqty qazaqty aıryqsha súıip, aıryqsha minezine kúıgen kisi joq. Abaı – ózine-ózi syn kózimen qaraǵan tulǵa. Abaı sózi, Abaı syny – minezimizdi ózgertýge tıer qamshy», – deıdi E.Toqtarbaı.
