JASANDY INTELLEKTINI QOLDANÝǴA QATYSTY ShARIǴI USTANYMDAR TALQYLANDY

QMDB Astana qalasy ókildiginiń uıymdastyrýymen «Áziret Sultan» meshitinde elorda meshitterindegi Pátýa bólimine jaýapty mamandardyń qatysýymen arnaıy jıyn ótti.

Basqosýǵa Sharıǵat jáne pátýa bóliminiń Astana qalasy boıynsha jaýapty mamany Joldas Qospaquly, «Nur-Sultan» meshitiniń ustazy Tamırlan Darhanuly jáne elorda meshitteriniń pátýa mamandary qatysty.

Jıyn barysynda qazirgi qoǵamda keńinen qoldanylyp kele jatqan jasandy ıntellekt tehnologııalaryna qatysty ózekti máseleler talqylandy. Atap aıtqanda, ǵylymı mazmun men zertteý materıaldaryn ázirleý kezinde jasandy ıntellektini paıdalaný, onyń múmkindikteri men sharıǵı turǵydan eskerilýi tıis tustary sóz boldy.

Sonymen qatar marqum adamnyń beınesin jasandy ıntellekt kómegimen qaıta jańǵyrtý máselesine arnaıy toqtaldy. Bul rette adam beınesin tsıfrlyq tehnologııalar arqyly jandandyrýdyń dinı-Etıkalyq qyrlary, marqumnyń ar-namysy men qadir-qasıetin saqtaý, onyń týystarynyń sezimi men quqyqtaryn eskerý máseleleri talqylandy.

Qatysýshylar atalǵan tehnologııalardy qoldanýda sharıǵat talaptaryn basshylyqqa alýdyń mańyzdylyǵyn atap ótti. Ásirese jasandy ıntellekt usynǵan aqparatty tekserý, ǵylymı jáne dinı mazmundaǵy málimetterdiń durystyǵyna kóz jetkizý, sondaı-aq tehnologııalyq múmkindikterdi jaýapkershilikpen paıdalaný qajettigi aıtyldy.

Источник: Aisha